Siizung rawlpektu Naam in an Dawt

England : Siizung rawlpektu Joseph George (kum 56) cu Brighton, Royal Sussex County Hospital innchaung dot 11 nakah mipakhat in naamte thawn voi 3 a dawt.

Siizung sungah naamte keng mipakhat a lut ih cu pa cun Mr George cu voi 3 rori a dawt tiin a hmutu mi pakhat in asim.

Naamte dawttuar Joseph George (kum 56) le a nupi

Amah cun, “naamte keng pa in sii retnak bizu ong dingin a fial. Mr. George cu rawl tawlreltu a si ruangah a neih mi card thawn sii retnak a ong theilo. Cutiih, bizu a ong theilolai takah naamte kengtu cun voi 3 rori a dawt” a ti.

Mr. George nupi khal anbuainak siizung ih hnaṭuan thotho a siih a mah cun, “kei cu zaan duty ka siih ka itthat lai fangah an buai. Tu ciah lawngah ka thei ve. Athuhla khal ka thei ciang lo. Naamte thawn dawttu khal zo a si ti kan theilo” a ti.

Naamte hmangtu cu palik 30 hrawng in an hawl cih ih nazi pakhat sungah an kaaingahsaal. Amah cu kum 30 hrawng mi a siih ziangduhsan in sual a tuah, tiimlaamcia in a tuah mi a si maw? Sii duhruangah naamte a hmang mi a si pei maw? timi thei ciang dingin palik pawl in an kaaingahveten palikzung ah an hruai.

Naamte dawttuar Mr George cu fa 2 nei zo a siih naamte dawtnak cu a nunnak hrangah ṭih a nung lo tiah palik in an sim.

DailyMail

Leave a Reply

Your email address will not be published. Required fields are marked *