Siizung ih Oxygen ventilator puakkuai ah Covid 19 mina 9 an thi

Turkey : Gaziantep, Sanko University Hospital ih Covid 19 mina besia deuh tuamhlawmnak ICU ah Oxygen ventilator a puakkuai ih minung 9 an thi.

Mithi cu kum 56 in 85 karlak Covid 19 mina hlir an siih mipakhat cu Siizung dang an panpi lai, lamziin lailak ah a nunnak a cem.

Puakkuainak ihsin a suakmi kaangmei cu an phal thei sal lohli ih meisa ruangih hliamhmatuar cu an um lo.

“Cozah lam in a ṭulmi hmuahhmuah hmalaknak kan nei. Vansiattong muallian sungkhat unau hnen khal ah tohpinak pek dingin kan tawlrel. Sanko University Hospital private Siizungpi ih minadang pawl khal kiangkap naivai Siizung dangah kan ṭhawn zo a si” ti`n Gaziantep governor zung lam in ca an suah.

Turkey Health minister Fahrettin Koca khal in minung 9 an thi thu namhngetnak a nei ih “Sanko University Hospital ih Oxygen ventilator puakkuai ruangah Covid 19 mina 9 an thi. Ram pin` kan riahsiatpi. Kaangmei ruangih harsatnak tongtu mina dang pawl khal 122 emergency team in kiangkap Siizung ah an ṭhawn zo. Ziangtin Oxygen ventilator a puaikuai timi khal zingzoinak kan nei cih ding” tiah Twitter ah a ngan.

Turkey ram ah Covid 19 positive case million hnih kim zik a um zo ih, cumi ah minung 17,610 an thi a si.

Leave a Reply

Your email address will not be published. Required fields are marked *