Siang lo cing ten Naute Lal Siam Thara ruak Vui Liam

November 11 ihsin hlo thok in a ni 7 nak ah thi cia ih a ruak sar mi naute Lal Siam Thara cu November 18 ah a umnak khua Vairengte ah a ruak vui nak an nei.

Amah hi C.Zo Than Mawia ih fapa neih sun a siih a hloh hnu ni 7 nak ah nungdam in an hmu netabiknak thawn km 3 hrawng hlat nak Cachar le Vairengte ramri ih Tuidaikhur tiva ah thi cia in a ruak an sar.

Cuih hmun ihsin November 17 zaanlam ah a umnak Vairengte khua ah an tlun pi ih mithiretnak inn ah zaan khat an ret lawk.

November 18 zing ah Aizawl ihsin ra mi forensic expert pawl in Lal Siam Thara ruak cu zohfelnak an nei ih a ṭul mi tawlrelnak an nei hnu ah naute Lal Siam Thara ruak cu Vairengte Thlaanmual ah Vui nak an nei a si.

(Hminsin : A ruak Vui lai na zoh duh le Video timestamp 13:04 hrawng ah na kaan ṭul)

2020, November 11 ih thil thleng

Lal Siam Thara pa, Pu C.Zo Than Mawia cu Auto Rickshaow mawng in pumcawmaw mi a si ih Covid 19 boruak le ramri buainak ruangih Petrol har ah Vairengte khua leng ih Vai pawl hnen ah a thupten Petrol a lei ṭheu.

November 11 zing ah Petrol lei tum in a fapa Lal Siam Thara, an inn kaing ih nauhak kum 9 mi le midang kum 16 mi mipakhat a hruai. Khua pawn an thleng ah a fapa le an inn kiang ih nauhak kum 9 mi cu Thlaam ah an tanta ih a hruai mi kum 16 mi thawn Petrol lei ding in an feh.

Nauhak pahnih cu Thlaam ah hlumṭek sai an lek ih kum 9 pate cu ekthawh dingin hmun dang ah a feh lawk. Ek thawh ding ih a feh tum cu Lal Siam Thara in ṭap phah in a dawi nan kum 9 pa te cun na pa hnen ah va feh aw ti`n a rak ti.

Petrol lei ding ih feh, Pu C.Zo Than Mawia a kir sal ahcun Thlaam ah a fapa a rak um nawn lo. Kiangkap Lo feh pawl in nauhak ṭap awn cu kan thei ih a ṭap aw suak dan ahcun umhmun ih ṭap rero vek in kan thei tiah an rak ti. Nautepa cun kiangkap dap in a hawl nan a fapa cu a hmu thei lo. Cutin kiangkap Lo feh pawl thawn ṭap awn an theih nak kiangkap le naivai ah an hawl ciamco nan an hmu thei lo. Cuih ni in Lal Siam Thara cu khawpawh in an hawl thok ih Khua hnen hmun dangdang ihsin khal mihlo hawl ah an tel ve.

YMA daan in mihlo cu ni 7 sung hawl ṭheu an si ih, mizaan November 17 kha a ni netabik hawl ding ni a si. Cuih ni ah beidong cuahco in an hawl hnu zaanlam nazi 2 luan hrawng ah Lal Siam Thara cu thi cia in a ruak an sar. Aruak an sar nak cu a pai` tantanak Thlaam ihsin km 3 hrawng hlat nak Cachar le Vairengte ramri ih Tuidai khur ah a si ih mithi Lal Siam Thara cu ti par ah bawk khup in a rak phuanaw a si.

Lal Siam Thara ruak hmusuak tu Pu Temple Mawia ih sim mi

Tui zing kan rawl ei thlacam ah Pathian hnenah dil in, a dam in lole a ruak tal in hmuh ter a ṭul tiin thla ka cam ih, cucu ka zum fawn a si. Asinan hramlak ka thlen tikah ka thlacammi cu ka mang nawn cuang lo.

Hmansehla a suk lamah ka vung feh vivo ih, mi fehcianak awmang ziang hman ka hmu lo ih, cutin hmunphiah bur hmun ah ka vung suk vivo. Cule Tiva ka vung thleng ih, Tiser a ummi cu ka hel. Cule Tiva ah ka vung suk ih cunah cun China tuahmi kedam neh vek ka hmu.

Hitawkah mi hlo hawlin mi an feh dah zo sihi ka tiih, cutin tivakua pawl ka titheitawk in ka hel vivo tikah ka nal ih ka bah. Tidai thawn ka tifaiaw ih, Tiva pakhat dang ka hmuhmi zawh phah in “ka so ding, hunserh hmang ding le kan si fawn si ih” tiin, thinlung ten ka ruat lai ah Tiva finawknak thlangte ciah ah, ngal can tidai ummi ah thilsente ka vun hmu.

Hinah, Barbie tum an hlawn maw si ka ti deuh nan, ruat thiam lo in, kan mi hawl a si pang thei lo sawm tiin ka vung feh ih, thing khamawkmi ka vun zawh ih lamkhat naih in ka zoh.

Tidai khal a fim ih fiang zet in ka hmu thei. A si rori tiih ka ruah ruangah midang ka phone ih cutin thuhla kan simthanawk thei. Cule meithal khal voi 2 ka hmet puak ih, minute 45 hnu hrawng ah midang pawl an rung thleng thei.

Himi thil thleng hi pawi ka ti tuk. Hmansehla a hlo ti lan men lo ih a ruak tal kan hmusuak thei hi kan van ṭha sawn tiin ka ruat ih, Pathian hnen khal ah lungawi thu simin, Bawipa ka va lungawi ve, kei kher kher in ka hmuh cu ka ti a si. Lungawi um zet a si.

Lal Siam Thara ruak an Vui
Mangbang thlak zet in Lal Siam Thara ruak hmuhsuahnak hmun hi tuhlan khal ah voi 3 lai an hawl zo nak hmun a si nan cuih ṭum ah zianghman an hmu lo. Cuih hmun thotho ah nisarih nak ih naute ruak an hmuhsuah sal mi le a kiangkap ih cangvaihnak neh lang mi hin mipi Lung a ti hring zet. Mihlo hawl pawl ih hawl hnu ah Lal Siam Thara ruak rak ret tu an um si pei maw titiang in thusutnak a um a si.

Asinan mithi ruak ahcun a lu ih mal te pem mi bak lo cu hliamaw le khawngawknak dang ziang hman a um lo tiah ṭuanvoneitu pawl in simfiahnak an nei. Lal Siam Thara ruak cu November 17 ah a umnak Vairengte khua ah an tlunpi. November 18 zinglam ah mithiam pawl in a ruak zohciangnak an nei hnu ah a nu, pa, sungkhat unau pawl in Lal Siam Thara ruak an Vui liam a si.

**A Ruak zohciannak result cu ṭuanvo neitu lam in tlangthannak an nei lo ruangah ziangvek dinhmun a si timi theihcian a si lo.

Leave a Reply

Your email address will not be published. Required fields are marked *

error: hahahahahaha !!