Sendai Khua Saklam Van par ih “UFO” in JAPAN mipi a ti Mangbang

Tlawngkai ni 3, Japan, Sendai khua saklam van par ih thil zam cun khawsung mipi a ti mangbang.

Ziang a si, ti thei lomi, Sendai khua saklam van par ih thil zam zuk cu social media ah an post ih “hih thil raang cu a canglo lawlaw. Ziang si pei?” “cozah tuahmi siding” “a um reituk thlang ual” tiin social media ah thuelawnak tiang a suak.

Sendai khua palik pawl khal an mang a bang. Khawsung thuneitu le pawlkom dangdang khal an sut nan zo hman in an thei lo. Social media ih an post mi zoh ciang a si le baloon tumzet ah thinglamtah tawnmi vek deuh khin a lang.

Helicopter thawn zam in an zoh nan ziang a si ti an thei ciang lo. Local palik cun “nikhua umdaan tahnak ih hmangmi baloon vek a bang nan kan mai ta si lo” tiin AFP hnen ah a sim.

Kyushu University’s aeronautics department pawl ih hmanrua si ding tiin an sut nan an nih khal in kan ta si lo, kan theilo an ti.

Kyushu University’s aeronautics department professor Shinichiro Higashino cun “zuk sung ta ka zoh ciang ih a zam mi baloon vek ah solar panel an bun a bang. Science thawn pehpar ih zirnak lole thil pakhatkhat zoh ciang nakih hman mi a bang” tiin Fuji Tv hnen ah a sim.

Van par ih an hmu mi UFO thuhla cu Japan ramsung ah a thang ṭheh ih Cozahpi tiangin an buaipi nan “foreign government ih thlah mi a si ding tibaklocu ziang hman simding an thei lo.

Sendai khua saklam van par ih thil zam cu tipi thuanthum lam a pan vivo ih Japan cozah in ziang a si tiih zingzoinak an nei man hlan ah nuam teten a zam hlo.

***UFO ti cu Unidentified flying Object lole Unidentified Moving Object tinak a si.

ref:AFP,IT

Leave a Reply

Your email address will not be published. Required fields are marked *