Selfie zukaw lai ah Mino 11 Ṭek in a tla that

July 11 ah Amer Fort innpi ih selfies zukaw lai minung 11 cu Ṭek in a tla that hai.

India ram ih hminthang, Rajusthan, Jaipur ih innhlunpi Amer Fort hi vehvaitu tourist an tam thei zet ih, July 11 zarhpisun ih Ṭek a tla lai ah minung 27 hrawng innpi ah an um.

Cupawl lakah mino 11 an thi ih thinphang in innpar ihsi dawptu hriam tuar khal an um tiah Jaipur hrambun media ṭhenkhat in an tarlang.

Jaipur, Nikhuatah zung ih ṭuanvonei Raj Radav cun “Nikhuasia Ṭek tlak lai ahcun innsung ah um cio thei sehla a ṭha bik. Atu ih vansiatnak khal hi atak cun hrial theih mi a si. Zarhpisun lawngah Ṭek tlak that mi mithi 21 an um” a ti.

Mithi pawl cu Lu khat ah Rs ting 5 thawn ramkulh Chief Minister Ashok Gehlot in ṭanpinak a pe hai.

Indian Meteorological Department in Ṭek tlak that tuar hi kum 1960 ihsin lethnih rori a ṭhang tiah thu an suah ih, hivek vanduainak a suak nak san cu Leilungpi boruak thlengaw ruangah a si ti`n an phuang.

Indian Meteorological Department in Ṭek tlak lai ih humkhamawknak ṭhabik a timi cu –

1. Ṭek tlak tikah inntumpi lole kiangkap mawṭaw sung ah um ding.

2. Bualrawn, mualpi tvk… hmunruak kaupi le Tlangkolh tivek ah um lo ding.

3. Beu nakding hmun a um lo le olaiten bat theihlo dingin kun phah in ke hnih cip, khuk ah kut ret le Lu kun in um ding.

4. Thingsang hnge nei lomi thingkung tang ah beu lo ding.

5. Tipar ah na um le zamrang thei tawp in hmunro lole tikap ah tlan zangzang aw. Tipi kap tivek ih na um khalle hmun him ah zamrangten tlan aw.

Leave a Reply

Your email address will not be published. Required fields are marked *