Sahara Nelrawn thlisia ‘Godzilla Dust Storm’ in US ram nuai ding

Kum tinten Sahara nelrawn thlisia hrang in Atlantic Ocean le southern United States lam a pan ṭheu ih tipi thuanthum zawhin Caribbean a thlen hrawng cun a ziamral ṭheh ṭheu.

Kum tin hrang ringring mi a si nan tukum 2020 Sahara nelṭiak thilsia cu kum dang vek a si lo. Sah khal a sah ih a tumtuk ruangah 408 km hrawng hlatnak boruak ih International Space Station khalin hmuhtheih a si.

Peng 3500 (5600 km) hrawng ih sau a siih a tumtuk ruangah “Godzilla dust cloud” tiin an ko. A fehnak lamziin zoh a si le Florida west ihsin Texas, North Carolina ihsin Arkansas lam tiang a thleng dingih zerhte le zerhpi hrawng ah Southeast US a naui ding tiin The National Weather Service (NWS) cun an phuang.

“Kum tin hrang ṭheu mi Sahara nelrawn thlisia a siih tuṭum ta cu a tumtuk cuang. Kum 50 sungih cakbik a si. A fehdan le a khul zoh ahcun hmaizerh ni 2-3 sung hrawng cu a zaam dingih Texas le Florida thlithiang pawl a ti bal ṭheh ding” tiin NWS meteorologist Patrick Blood cun a sim.

University of Puerto Rico’s School of Public Health zung bawi Pablo Méndez Lázaro khalin “Kum 50 sungih thacakbik nelrawn thlisia a siih Caribbean tikulh tamzet hrang khalah tih a nung zet” tiin AP hnen ah a sim.

An thinphan bikmi pakhat cu COVID-19 karhzai cuangnak hmun pawl ih thlisia hrang ding hi a siih “Covid – 19 nathrik kai pawl cu an thawthawt a har ih, tuah, thlisia in, in nuai bet ding tikah mina pawl hrang ah ngaituah um zet” tiin Boston University’s School of Public Health ih professor Gregory Wellenius in a sim.

Health officials khalin thilsia hrang cuangnak hmun ihsin a hlat thei biknak ih um dingin le innsung ih um ringring ding in khawsung ah tlangaunak a nei a si.

ref:LiveScience,IT,NetGeo

Leave a Reply

Your email address will not be published. Required fields are marked *