Russia tuar nat zia, an mah cozah lala in pholang

Russia in Ukraine a luhcilh hnu, leitlunhuap ram ṭhenkhat in mi ram luhcilh ih ral thoter ti`n Russia cozah cu a phunphun in hrem nak an tuah.

President Putin telin Russia cozah le an lamṭang media ṭhenkhat cun hremnak pawl cu ziang si tham lo vekin online ah an tarlang nan, a tu ah an tuar nat zia langtertu “Russia phat santu ram pawl” tiih tarlang mi ram cazin pawl cu cozah rori in Putin hmin khen in an suah a si.

Cumi cazin ih telmi ram le state pawl cu “United States le Canada, EU states, UK (Jersey, Anguilla, the British Virgin Islands, Gibraltar tipawl an tel cih), Ukraine, Montenegro, Switzerland, Albania, Andorra, Iceland, Liechtenstein, Monaco, Norway, San Marino, North Macedonia, and also Japan, South Korea, Australia, Micronesia, New Zealand, Singapore le Taiwan” tipawl an si. (Taiwan cu China ram vekih ruahmi a si nan 1949 kum lam ihsin mahte ukhruaiawknak an hmang zo)

Tarlangmi ram le states pawl cu Ukraine luhcilh a si hnu, Russia cozah hremtu lole hremnak rak pompitu ram pawl an si ih, Russia cozah cun kan ram phatsantu tiah an tarlang a si.

Russia ram pursum tuahnak lam phitsaktu le hremnak lungkimpitu letlunhuap ram pawl cu Russia cozah in hrem leet dingin hmalaknak a nei rerolai tiah theih a si.

Ukraine politician hminthang pakhat cun hitin a rel.
“Ram picang le leitlunhuap pawlkom pawl ih hremnak cun Russia a ti na zet. Ziang si tham lo vekin Lem an cang nan hmalaknak an nei mi pawl hin an dinhmun a langter. Abikin SWIFT banking system hmang thei lo dingih an kham mi hin a ti na zual. Leitlunhuap sumsaw transfer nak hrangah China cozah an biak ih bank account thar an ong. Cumicun an tuar nat zia a ti lang ih, “kan ram phatsantu kan hrem ding” an ti bet mi cun an phenawknak a hlit sak thluh” a ti.

Leave a Reply

Your email address will not be published. Required fields are marked *