Russia President Putin ih innsang fanau pawl relhnak hmun pholang

Ukraine-Russia buainak ruangah leitlun ralpi tho thei dinhmun a si ih, cuvek boruak ah a innsang him thei dingin Russia President Putin in a nufa pawl cu leithuai hmunthup ah a kuat hai tiah thuthang a suak.

Cuih thu cu Moscow State Institute of International Relations ih professor rak ṭuan dah, Russia political scientist Valery Solovei in a rel mi a si ih, amahcun “Nuclear ralpi a tho tikih relh nak ding, hmun him ah tubai ah a kuat zo” tiah a ti.

Russia, China, Mongolia le Kazakhstan ramri ih um Altai Tlang ah a kuat zo tiah amahcun a rel ih “Nuclear teilo dingih tuahmi leithuai relhnak ‘bunker’ ah a kuat hai zo” tiah a ti.

Valery Solovei cun Russia cozah sunglam ihsin thuthup dongmi sivekin a rel ih, tuhlan khalah Putin in mipi a theihter duh lo mi nat sia a nei thu cu cozah sunglam ihsin in sim thei tiah a rak rel dah.

Valery Solovei khih hmuh mi hmunram ah tuhlan kum 10 hrawng ihsin Gazprom company in Putin hrang innthuppi an sak tiah thuthang a um dah ih, cuih innpi thuhla zirzotu miṭhenkhat cun thli lutsuaknak ventilation tamzet an hmu thu le khawte pakhat khawpkham ko hman theimi meisa hri pawl an thluah tiah an rel.

Miṭhen cun Valery Solovei thurel cu thu lengvak men a si tiah an rel nan Putin damlo thu a rak rel lai ah Russia cozah thuneitu pawl in a inn an luhcilh ih ceet theilri ṭhenkhat an lak sak hlei ah palikzung ah hruaiin nazi 7 lenglo thusutnak an nei. Amahcu an thlah saal lohli nan thubuai a nei mi cu atutiang an phit sak hrih lo ti a si.

President Vladimir Putin hin tuhlan a nupi thawn fa 2 an nei ih khawtlang mipi hmuh ah a suakter dah lem lo. A nupi thawn 2014 ah an ṭhenaw ih, cuhnu ah a thuten nupi pakhat a kol hlei ah fanau a thupten an nei tiah thuthang a um.

Amah hi a innsang thawn pehparmi hmuahhmuah cu a thup thei bikin a kil khawi ih, tuṭum Ukraine-Russia buainak a suak hnu, a sungte pawl hmun him ah a kuat thup timi cu a tak a si thei tiah a thuruat dan theiciangtu mithaim ṭhenkhat khalin zumnak an nei a si.

Leave a Reply

Your email address will not be published. Required fields are marked *