Russia in manolten US cozah a rak zawrh mi Alaska ramkulh khirh saal dingin dilngen

Ukraine ram luhcilh ruangah Russia cu US cozah in a phunphun in a hrem ih, cozah zawng ih pursum tuah nakin siseh, bulpak khalin a phunphun in a hrem.

US hremnak cu Russia in a la na zetih nasa sinin hremawknak a um bet vivo ruangah tuar thei nawn loin President Joe Biden, Secretary of State Antony Blinken, Defense Secretary Lloyd Austin, C.I.A. director Bill Burns, US President fapa Hunter, Hillary Clinton tipawl telin US cozah mithupi 13 pawl cu Russia ram lut khap nak thawn hremnak an tuah thu an phuang ve.

Russia hremnak cu State Secretary hlun Hillary Clinton in capohsai nakah a hmang ……

Russia in US ram mithupi 13 pawl a hrem hlei ah Putin tuamhlawmtu State of Duma member Dr. Oleg Matveychev cun Russia cozah TV ah hitin thu a phuang.

“Hremnak in tuah mi le raldonak ih kan tuar nak pawl ṭhaten kan ruat saal ṭul. Asancu cumi pawl ruangah paisa kan sung ih, kan ngah saal tengteng ṭul.”

“US ram ih an can mi ram telin Soviet Union san le atu santhar Russia ta a si mi thil hmuahhmuah cu kan ngah kir saal ṭul” tiah a ti.

Russia state Tv host vladimir soloviev in “Alaska na sim duh san maw si” tiah a sut ih “Cumi ka rel duh mi si. Antarctic rampi khal kan mah hmuhsuahmi a si ih kan ta thotho a si” a ti. (Source)

US ram, ramkulh 49nak Alaska ramṭhenkhat cu kum 1867 tiang Russia ram a rak si ih, Russia cozah in U$7.2 million thawn (tu san dollar U$130 million) US cozah hnen ah a zawrh mi a si.

Tuṭum, Russia le Ukraine ram an buai hlan khalah Russia rammi miṭhenkhat cun kan ram a si ih in pek saal a ṭul tiah an relsuak ṭheu a si.

Leave a Reply

Your email address will not be published. Required fields are marked *