Russia, China le Iran hacker in Donald Trump le Joe Biden an Bat

2020, November ih tuah dingmi US rampi hrilawnak tibuai tum in Russia, China le Iran hacker pawl an cangvai tiah Microsoft in a phuang.

President Trump le Joe Biden campaign thawn pehpar mi pawlkom computer pawl ah an lut thup tum ih, Kum 2016, US rampi hrilaw ṭum ih hrowlhawtu Russia hacker pawl khal an tel tiah Microsoft cun a phuang.

Microsoft vice-president Tom Burt cun, “Phosphorus tiih kohmi Iran hacker, Zirconium tiawmi China hacker, Strontium (Fancy Bear tikhalin an ko) an ti mi Russia cozah thawn pehzom awmi hacker pawl an si. President Trump le Joe Biden campaign thawn pehzom awmi pawlkom computer pawl ah lut in information fir an tum.” a ti.

Russia hacker Strontium cun kum 2016 vekih cangvaisal tum in US ramkhel party thawn pehzom awmi pawlkom 200 lenglo bat in an cangvai tiah Microsoft cun a tarlang.

Microsoft cun hacker cangvaihnak an hmuhsuah veten US cozahpi hnen ah thuthannak an nei cih.

Trump administration lam cun “election system le vote pek danding tvk thawn pehpar mi an tham ban lo” tiah thu an phuang.

Joe Biden lam khalin, “hrilaw ni hrang timlamnak kan nei thok ihsin kan ralring cia mi a siih ziangvek buainak hman kan tong lo” tin thu an phuang ve.

Hih ramthum Hacker pawl cu US rampi hrilawnak thlingthla dingin 2020 kum thok lam in an cangvai thok zo ih, hih thuthawn pehpar in US intelligence community cun “Russia in Mr Biden dungkirter an duh ih China le Iran in Trump sungter an duh” tiah August thla ah a rak phuang dah ti`n The Verge website cun a tarlang.

Leave a Reply

Your email address will not be published. Required fields are marked *