Riittheih ruangih Comedian Bharti Singh kaihkhih tuar cu India mipi mangbang thluh

India mipi in zohṭhihtlak zet ih ruah mi Comedian Bharti Singh (Kum 36) cu riittheih thilri ruangah Narcotics Control Bureau (NCB) in zarhte ni ah an kai.

An umnak inn le a pasal screenwriter Haarsh Limbachiyaa (kum 33) thawn ṭawmawmi office ah Siichauk (ganja) 86.5 grams hmuhsuah a si ruangah kaihkhih tuar mi a si.

November 21, zarhte zing ah Siichauk grams 40, 15 LSD dots le Nitrazepam tablets phurtu kum 21 mi cu NCB in an kai ih thusutnak an nei lai ah a phurmi thilri a zuar ṭheu nak pawl a phuang suak.

Thuthang an theih hnu nazi kaar sungah NCB Zonal Director Sameer Wankhede hoha mi officer team khat cun Bharti Singh inn le office cu an va siim ih Siichauk (ganja) 86.5 grams an hmusuak a si.

An nupa ten palik zung ah thusutnak an nei ih “Siichauk kan fawp ṭheu ko” ti`n an phuangaw ruangah le an inn le office ih Siichauk hmuhsuah a si ruangah Barti Singh le a pasal cu Thawnginn ah an khum cih ih an thuhla zingzio peh vivo an tum.

Bharti Singh cu tulai India comedy show host tu lak ih milarbik pakhat a siih tukhalah Khatra Khatra Khatra timi comedy show host tu dinhmun in hnaṭuan rero lai a si.

2020, June 14 ih thlaiawthat Sushant Singh thih ṭum ah a falanu in riitthei thilri a pek ringring ruangah lungbuai in a thataw tiih thuthang suak thokin Bollywood khuavel ah riittheihsii an hmang nasatuk timi thuthang a leng ih cuih thuhla ruangah bollywood film star hminthang Deepika Padukone, Shraddha Kapoor, Sara Ali Khan le Arjun Rampal te pawl khal palik zungah ko in Narcotics Control Bureau in thusutnak an nei.

Cuih ṭum in Narcotics Control Bureau cun Bollywood khuavel le riittheihsii pehzomawnak nasaten an haisuak ih riittheih sii ruangah film production executive Kshitij Prasad, Agisilaos Demetriades le Engineer hminthang Shabana Saeed pawl khal kaihkhih an tuar a si.

Leave a Reply

Your email address will not be published. Required fields are marked *