Refugees camp ih um Rohingya raltlan 100 luan an hlo

Indonesia, Lhokseumawe khua refugees camp ih um Rohingya raltlan 100 luan cu an umnak theih a si lo ih UN lam khalin siseh Cozah lam khalin an umnak an theilo.

Lhokseumawe ih um Rohingya raltlan pawl cu kawlram ihsin tlansuakmi an siih 2020 June le September thla khan, Lhokseumawe refugees camp ah minung 400 hrawng an thleng.

Cuih hmun in minung 100 luan an hlo ih, atuah raltlan 112 lawng an tang. Mihlo pawl cu minung zuar ih sumtuah pawl kut sungah thleng pang in human traffic Suur sungih awh hlo an si pang pei maw tiah cozah le UN lam donhar in an um a si.

“Local thuneitu le UN lam khal in an umnak an theilo. Nan, kan thei dingmi pakhat cu Rohingya raltlan ṭhenkhat cun hih hmun tlansan an tum ringring. Tikcu caanṭha a um cun tlanhlo an tum. Cucu an tumtahmi khal a si.” tiah Lhokseumawe ih Rohingya taskforce ṭuanvonei Ridwan Jalil in a sim.

Kum 2017, Myanmar ram ih buainak suak ṭum ah Rohingya Muslims ting 7 luan cu raltlan dinhmun in Bangladesh ram lam an pan. Nan, raltlan 1000 luan hrawng cu Bangladesh ih lut duh lo lole Bangladesh suahsan in Indonesia le Malaysia lam an pan.

“Nuntukhawsak nakah Bangladesh hnakin hilam hi ruahsanding atam deuh. Curuangah raltlan tamzet cu Indonesia le Malaysia ram ah an ra tlan. Daanlo ih lut ding an si tikah paisa pek in smuggler/trafficker pawl an hmang. Tipi thuanthum kaan ih rat a ṭul tikah rawl eiding nei nawn loin lamziin lailak ih thi khal an um ih Smuggler pawl ih hremnak ruangih mithi khal an um.”

“Indonesia ra thlengsuak pawl cu refugees camp ah khum in an um. Zalen zetin umduh ruangih ratlan an si tikah suak tlanhlo danding bawh ringringtu khal an um ih Malaysia lam ih tlanthup khal an um. Kan nih lam cun smuggler kut ih thlen ṭih a nung zia kan sim ih tlanlo dingin kan kham nan tumtahnak neiih ra mi raltlan an si tikah camp ihsin an tlan thup ṭheu” tiah Ridwan Jalil cun a sim hrih.

UNHCR ih ṭuanvonei Mitra Suryono khalin “Refugees camp UN kuthnui ihsin tlansuak a ṭihnung dan kan sim ṭheu. Smuggler kut sung ih um hi an hrangah a ṭihnung zia kan sim ṭheu. Cucingin an tlansuak thotho. Atui` mihlo khal hi Malaysia lam ih sungkhat unau nei an si ruangah hih hmun ihsin a thupten an tlansuak mi khal a si thei” a ti.

Leave a Reply

Your email address will not be published. Required fields are marked *