Ralthuam phurtu Russia Lawngpi an kap puak

Russia kut ah a um zo mi Ukraine ramsung, Berdyansk khua, Lawngcolhnak tikap ih Russia ralthuam phurtu Lawngpi cu Ukraine ralkap pawl in an siat sak thu an phuang ih a puak kaang lai video an thlah cih.

Ukraine nisuahnak thlanglam ih um Berdyansk khua cu Russia ralkap in Ukraine an luhcilh hnu, a ni 4 nakah an la mi a si ih Ukraine ramsung cangvainak ah an hmang ṭangkai zet.

Russia Lawngpi an siat sak mi ah ziangvek thil pawl a um ti cu tarlang a si lo nan, kan dung zarh lam ah Russian state news agency TASS in 1,500 tonnes thilri phur theitu Russia ralthuam phur lawngpi cu Berdyansk lam pan in a pok tiah an phuang.

Russia media ṭhenkhat ih tarlangmi Ralthuam phur Lawngpi

Russia cozah TV thuthang thlahtu Zvezda khalin Tank 20 le raldo mawṭaw 40 phur theitu Russia Lawngpi cu Berdyansk lam pan in a pok suak tiah an rak phuang dah.

Ukraine ralkap in Russia Lawngpi an kap puak ah mithi ziangzat an um ti cu fiangfai in theih a si lo ih, Lawngpi a kaang thu le a kiang ih Lawng fate 2 a hngor ban thu, Ukraine media in an tarlang a si.

Leave a Reply

Your email address will not be published. Required fields are marked *