Ralring : Covid 19 Vaccine Lem Online ah an zuar thok

International Criminal Police Organization (Interpol) in Covid 19 vaccine lem a suak thei ruangah ralring lungtho zetih um cio dingin Leitlun ram 194 ih a member pawl hnen ah thuthannak a nei hnu thlakhat hman kim hlan ah Darknet (Online Black Market) ah Covid 19 vaccine lem siding zumummi an zuar thok taktak.

UK ram ah Pfizer/BioNTech tuah mi covid 19 vaccine tlangzarhnak an nei thok ihsin online Black market khal ah an zuar thok mi a si tiah zingzoinak neitu Vice media in a tarlang.

Covid 19 vaccine cu voihnih dawt ih dawt dingmi a siih online black market ahcun pakhat ah $1,300 in an zuar.

Siizuk tarmi tang ahcun “Covid 19 vaccine cu Pfizer le BioNTec tuah mi a si” tiah an ngan ih “Khawi ram khal ah kan kuat thei” tiah an tarlang.

Vice media in darkweb ih Siizuartu mipakhat hnen ah Sii vai an nei thei dan a sut ciang tikah “Cozahpi hnen ihsin kan ngahmi a si. Customer tamzet hnen ah kan zuar zo ih tukhalah doses 560 hrawng kan nei” a ti.

Hih thuthawn pehpar in University of Sydney ih professor Dr Barbara Mintzes in “Leitlunhuap thular buainak a um tinten online khawvel ahhin bumawknak a suak ringring. Covid 19 pulhnat suak pek lam, April thla khal ah personal protective equipment (PPE) lem/firmi, nat test nak lem/firmi, Covid 19 nat ihsin damsuakzotui` thisen an timi pawl cu darknet ah an zuar ciamco.”

“Tuṭum ih Pfizer/BioNTec tuah mi Covid 19 vaccine an zuarmi khal hi zumding a um lemlo. Asan cu a tui` vaccine cu adailam minus-70 degrees centigrade ih retṭulmi a si tikah lenglam ah duhduh ih thiarsuak theihmi a si lo ih a ret nak ding bungrua khal olaitei` ngah theih mi a si lo. UK ram ih cahmi vaccine pawl khalkha a phur danding reizet tawlrelhnu lawng ih tuahsuak theimi a si. Curuangah darnet ih zuarmi Covid 19 vaccine cu a lem siding zum a um” tiah Vice media hnen ah a sim a si.

Siarbet : Interpol in Leitlun ram 194 ah Covid 19 vaccine thawn pehparmi Ralrinpeknak ca a kuat

Interpol ti`h koh mi International Criminal Police Organization cun Covid 19 dokhamsii a suak thlang ding ruangah Sii lem tuah ih zuartu misual pawlkom an um thei ruangah ralring a ṭul ti`n December 2, tlawngkai nithum ah thuthannak a nei.

France hrambun Interpol headquarter ihsin Leitlun ram 194 ih a member pawl hnen ah ralring lungthoten um cio dingin thuthannak a nei mi a siih online in siseh, lenglam ah a tak in siseh misual pawlkom ho in Covid 19 vaccines bat in cangvainak an nei thei ruangah ralring cio dingin thuthannak a nei a si.

“Covid 19 vaccine tlangzarh dingin Cozahpi in timlamnak a nei thok ih misual pawlkom ho(criminal organization) in hrolhawk le hnaihnok an tum” ti`n Interpol secretary general Juergen Stock in Reuters hnen ah a sim ih “Criminal networks pi khal in Sii lem lole Sii zuarnak website lem tivek hmangin mipi an bum thei. Hivek hin harhdamnak siseh, milai nunnak tiang a khawng ban thei a si” a ti.

Hmaizarh ihsin UK ram ah Pfizer le BioNTech company tuahmi Covid 19 vaccine hmanthok a si thlang ding timi thuthang a suak hnu ah Interpol in a member pawl hnen ah thuthannak a nei mi a si.

US ram khal ah misual pawl hrolhawklo dingin Covid 19 vaccine tuahtu Pfizer, Moderna le company dang tamzet cu Homeland Security invertigator thawn hna an ṭuan tlang ih Sii vai suah tikah buaibainak um lo dingin hmalaknak an nei rero a si.

Tudinhmun ah Leitlunhuap in Covid 19 mina 63,738,037 an um zo ih cumi lak ah minung million khat le hrek kim zik an thi zo a si.

Leave a Reply

Your email address will not be published. Required fields are marked *

error: hahahahahaha !!