Ralring : Covid 19 nat nei hnu ih Thinlung lam buainak tongtu an Pung vivo

Covid 19 natnak ihsin dam zo hnu ah Thinlung lam buainak tongtu an pung vivo ruangah mithaim pawl an mangbang thluh.

Thil umlomi hmu ciamco le bum tuar mi sivekih theiawtu Thinlung lam buainak tongtu tamsawn cu Covid 19 nat nei nan besia lo ih dam sal hlir an si.

New York, Long Island, Psychiatric hospital ih Dr. Hisam Goueli cun Thinlung/Thluak lam buainak tongtu, kum 42 mi, a mina thuhla a rel suak.

Amah cun “Ka mina te innsungsang hi thinlung thawn pehpar aw-mi natnak tivek neitu innsang an si lo. Cuti cingin Amityville, South Oaks Hospital ih a to rero lai ah kum 2 ihsin kum 10 karlak a si mi a fa le pahnih cu rapthlak zetih that an tuar lai hmu vekin a um. Cuhlei ah a mah rori in a fa le cu that tum ih tawlreltum vekin a um ciamco. A fa pakhat cu truck pi i rialbek thluh vekin a hmu ih pakhat sawn cu a sa sam thluh vekin a thei/hmu thu a rel.”

“Fimthiamnak, neisiah lam khal ih hlawhtlingnak hmutu minu rori in ‘ka fa le ka duhdawt zet nan ziangah sipei hivek in ka um ih ka hmu ciamco. Keimah rori in an sa sam thluh duh vek in ka um’ a ti cu a rapthlak tuk” a ti.

Cu nu cu media lam in interview an nei tum nan a duh lo ih a thil hmuhtonmi pawl cu a enkoltu Dr. Hisam Goueli a relsuak ter.

Dr. Goueli cun “a medical history ih relding umsun cu tuikum Ṭhal thok hrawng ah Covid 19 nat pianhmang langtuk lemlo thawn caan malte a nuam sam lo. Nan, Thla khat-hnih rei hnu ah mah le mah that aw dingih fialtu awthawm a thei, cuhnu ah a fa le that a fial” a ti.

South Oaks siizung cu an siizung ih um Covid 19 nat nei pawl thinlung lam treatment laknak ih hman cihmi a si ih thinlung lam buainak tongtu nu thawn pehpar in, “Covid 19 ruangah khal si thei, a si lo khal si men thei” ti`n Dr. Goueli cun a sim.

“Nan, a mah vekih buai case 2, case 3, case 4 a um bet cu ‘thil pakhat cu a um hrimhrim si ko’ tiah zumnak kan nei” tiah a sim hrih.

Tuvekin Covid 19 nat nei hnu ah thinlung buainak tongtu hi Leitlun huap doctor tamzet in report nak an nei ih US ramsung lawng ah siloin ramdang khal ah hivek buainak tongtu an pung vivo. Dr. initerview neinak le scientific article khal ah hmuh ding a tamzet.

Kan dung baite khal ah North Carolina nursing home pakhat ih hnaṭuan kum 36 mi cu a fa le pathum kidnap tumtu an um vekin a thei ih a buai ciamco. Ka bawm ṭul a ti ih sangkate (fast-food restaurant’s drive-thru window) ah a van ciamco.

New York construction site ih hnaṭuan kum 30 mi khal a thinlung a buai. Ka cousin in in thattum timi ruahnak a nei ih a mah le mah humaw tum ah a cousin it lai cu a reek that tum.

British ram ih um kum 55 mi khal cu a ruahnak/mitthlam ah Kiosa le Zawngte a hmu ringring ih a netnak ahcun kan innsang member sungah lenglam mi kan innsang ih um impostor a um tiah a buai ciamco.

Tlunlam ih kan tarlang mi pawl cu Covid 19 natnak thawn besia lemlo ih damlotu pawl an si ih natnak an kai hnu zarhkhat-thlakhat hrawngin thinlung lam buainak an nei thok mi a si.

Dr. Hisam Goueli cun “ziang ruangah hivek an cang? An dam hnu ah a hlo lan pei maw? ziangtik hrawng tiang a deih? Hivekin an um ruangah thinlung lam buainak nat dang tivek teh an ngah ol ciang pei maw? ruah ding tampi a um. simfiah theih lomi thusutnak tamzet a um” a ti.

Leave a Reply

Your email address will not be published. Required fields are marked *