Ralring : Covid 19 boruak ah Bumawnak Thar a Lar

Covid 19 boruak ah leitlun ram tinkim deuh thaw in harsa kan ṭuar ih a bik in harsa cia pawl in kan tuar na cuang. Nica hlawh ring pawl phei cu hnaṭuan ding a um lo ruangah ei-in ding ti le rawl kan tlasam ih mah le mah that aw khal siarcawklo in an tam thlang.

Cuvekih harsatnak phunzakip kan tuar lai cu misual, mi hrawkhrawl pawl cun caan ṭha ah lak in mi bum danding an tawlrel. Kan nih in le harsa beidong thinhar cia thawn kan hlawk pi phah pang ah ti`n kan rak zum sual pang ih kan neih sun cia tiang kan sungral phah thluh.

Tuhlan ihsin online ih mibum hmang an tam zet ih kan nih Chin mi lak khal ah bum tuar kan um phahphah zo.

Tulaifang ih online bumawnak tamsawn cu Covid -19 thawn pehpar in mi an bum ih mi paisa ei-ruk danding a phunphun in an ngaihtuah. Cozah rori khal in boruak umdan an thei ciang ih ralring cio dingin Official rorin mipi an theih ter.

SMS, Email le Messenger
Technology san a si vekin hmunhla thuthang thanawnak ah SMS, emial lole Messenger tvk kan hmang ih online bumawnak khal ah cumi cu an hmang ve zet.

“Covid 19 boruak ih hnaṭuan neilo miharsa pawl hrang ah Cozah lole NGO pakhatkhat in bawmnak pek an tum. Himi bomnak ngah ding cun himi links ah lut aw la register tuah aw” tvk in, zum um, official bang deuh dingin mi ca an kuat ih link sung kan lut tikah app download an fial.

Cuih app ahcun phone sung ih information fir theitu malware an ret tel ih a hmangtu pawl thei lo sung ah id, bank account tvk information an fir ih midang hnen ah an zuar sawng sal ṭheu. Cuih information cu mibumnak ah an hmang sawng bet ih buainak suak lole palik tiang tel ṭul dinhmun a thleng tikih zingzoinak an nei vivo cun bumtuar pawl hnen ah a khih hmuh lala ih an mah in an tuar lala.

Kan dungbaite khalah India ramsung ah Covid 19 thawn pehpar in bumawnak pakhat a lar zet.

“Thuthangṭha, Covid 19 boruak ih harsazual pawl hrang ah bawmnak pek tum in Facebook le Jio company kan ṭang tlang. A lak in nikhat ah 25GB data, thla 6 sung kan zem tum. Free data dong na duh le himi link ah luat aw” timi ca cu SMS, email le Messenger thawn mi an kuat ciamam ih link vun hmet tikah website pakhat ah mi a hruai. Cuih website sungih Jio 25GB Offer ti`h cangan mi tang ah app pakhat a um ih cumi app download an fial.

Cuih app cu phone ih an thun tikah Prime Offer timi app pakhat a lang ih a sung vun zoh ahcun zianghman a um lo.

Ziangmi app bik a si tikhal theihciannak a um lo ih mithiam pawl cun app hmangtu pawl ih information fir theitu malware lole ransomware siding an zum.

Joi company lam in thuthang an theih veten simfiangnak an tuah ih “Reliance Jio company in hivek Offer kan tuah dah lo. Covid 19 boruak ih bumawknak phunkhat sawn a si. App hmangtu pawl in buainak pakhatkhat an tong pang le kan mah in puh thei lo. Kan mah tuah mi a si lo ruangah buainak a um pang sile app hmang tu in a tuar a ṭul. Curuangah hivek bumawnak ah kan fim khur a ṭul” ti`n mipi hnen ah thuthannak an nei.

Phone biaknak thawn mi an bum
Covid 19 boruak ih lockdown le ramri phit ruangah mah ram tlung thei lo tamzet an um. Cumi cu hrawkhrawl pawl in mibumnak caan ṭha ah an hmang. Mi pakhatkhat hnen ah phone an call ih “Covid 19 lockdown ah cuih hmun ah ka tang. Tu ah, kei khal nat ka kai. Na (uu, nau, sungkhat) ka si. Nat ka kai ruangah ka aw dang thluh mi si. Tu rori ah bawm ka ṭul. cumi kha mi ah paisa in kuat ṭul” ti`n mi an bum.

Hmunhla ramhla ih fa le nau nei mi kum upa lampang an bat ih Covid 19 boruak thinphang thawn bumtuar siarcawklo an um.

Phone number ziangtin an nei thei?
Dawr thil lei nak tivek hmun ih phone number an dil ṭheu khi pek lo seh la a ṭha mei. Kha vek hmun ih kan pek mi phone number zuarsal hmang an um. Abikin US ram lam ah a tam thei zet ih online ah zuar sawng in mibumnak ah an hmang.

India ram bumawnak call center ih phone number an nei mi ṭhenkhat cu US ram ih dawr ṭhenkhat ih zuar sawng mi a si. Dawr hnaṭuantu rori khal in an zuar thup ih an dawr data hack sak ih customer phone number firmi khal a tam zet.

Facebook ih phone number lang dingih kan ret mi khal khi ṭih a nung zet. Mibumhmang pawl in an khawlkhawm ih mibumnak lole mibumnak ih hmang sawng sin dingin an zuar ṭheu.

Online bumawnak cu ngan cawk lo ding khawp in a tam ih a remcang a si le ngan peh leh kan zuam ding.

Leave a Reply

Your email address will not be published. Required fields are marked *