Ralhraangbawi Min Aung Hlaing le Russia President Putin cangvaihdan a bangaw

“Information is a weapon” an ti bangin hruaitusual le thilung ṭhalo pawl cun an duh zawng ih thil ser nakah “Information” an hmang.

SAC ralhraangbawi Min Aung Hlaing khalin rampi ukhruai thuneihnak a la veten ramsung thuthang luangsuksodan a control tum hmaisabik.

Thuthang suahtu le mipi thatho dingih awann thlah theitu mihminthang pawl a bat hmasa ih mipi lungbuai dingin thuthang diklo phunphun a darhter. Helicopter tiang hmangin mipi lung buaiter dingin khawsung ah thuthang diklo an theh darh.

Cuvek ṭhiamṭhiam in Ukraine ram luhcilh dingih thusuahtu Russia President Putin khalin tuhlan hnakih nasa sinin ramsung thuthang luansuaksodan a control.

Mizaran ih siar/zoh mi ramsung newspaper le Tv station zaṭek 60% hrawng cu Russia cozah in a kai mi a si ih cumi pawl hmangin tumtahnei thuthang phunphun cu mipi an fah ringring.

Tuṭum, Ukraine-Russia buainak a suak hnu tla cun ramsung cangvaihdan an ti danglam sinsin ti a si ih khawte lam deuh ih um pawl tla cun an ram buainak thu zianghman an thei lo.

Ramlengum Russia ram mi mipakhat cun a sungte seherh in February 28 ah a bia hai nan khawte deuh ih um a sungle pawl cun an ram buainak zianghman an thei ve lo thu an rel.

“Russia um ka sungte pawl thawn kan biakawk ih ramsung thilthleng a mukmak khal an thei lo. Media lampang cu a thim bepbep thluh. An theih sun cu cozahpi ih tumtahnei thuthang pawl lawng a si” tiah amahcun a ti.

A ca ngan cu minung tingteel in an share sawng ih “IT san ah hivek ukawknak a um lai cu cohlan theih a si hrimhrim lo. Curuangah tuṭum buainak hi pahtlang lawlaw tum in ramsung khalin theitawk suahin cangvai tum cio uh si” tiah Russia mipi pawl online ah sawmthanawknak an nei a si.

Leave a Reply

Your email address will not be published. Required fields are marked *