Ralhraang tham ban lo dingih ret ṭhat mi $3 billion lenglo cu Mipi zem khawm tum

Afghan central bank in US bank account ih bawmnak paisa $7 billion lenglo a ret mi sungin 9/11 ṭum ih siattong innsang pawl hrang ah $3.5 billion lenglo an hmang tum tiah theih a si.

Cuih paisa cu US ram le leitlunhuap mibawmtu pawlkom pawl ih kum 20 sung Afghan mipi hrang bawmnak an pe khawm mi a si ih, Taliban ralhraang in Afghan cozah thuneihnak a la veten US cozah in zohman tham theih lo dingin a ret ṭhat mi Afghan cozahhlun paisa a si.

“Taliban ralhraang in World Trade Center innpi an pahsiat ṭum, 9/11 ih vanduainak tongtu innsang 100 luan in ralhraang taya an cuai ih sual tuahtu pawl thuṭhenzung ah an suak thei lo ruangah a heektu pawl cu fund ngah dingin thuthluknak an tuah. Curuangah hitin thu a suak mi a si ih President Biden in lungkimnak hmin a khen cun hmalaknak a um vivo ding” tiah sunglam thutheitui` relmi cu New York Times in a tarlang.

Asinan ruah ding tampi a um mi cu Taliban ralhraang pawl cu Afghanistan cozah dik ti`n US cozah in a pom hai lo. Curuangah zohman tham theih lo dingih ret ṭhat mi Afghan central bank paisa cu ukhruainak latu Taliban ralhraang paisa a si ti`n 9/11 siat tong pawl an pe ding maw? ti hi thusutnak a um.

“9/11 siatton fund ngah tuding lak khalah an hmuh dan a bangaw lo. Afghan mipi harsa pawl bawmnak dingah a feh ṭul titu an um bangin Daan thawn milaw ih kan covo ding ti hlawhtling a ṭul titu an um ve.”

Biden admin khal, US ralkap an ko kir hnu, Afghan mipi bawm thei dan dingah harsatnak an nei ti a si ih, Biden in 9/11 siattong hrang paisa a ti felfai cun Afghan central bank paisa $7 billion sung ihsin a hrek hrawng cu Afghan mipi bawm nak dingah a feh ding tiah thu a um a si.

Leave a Reply

Your email address will not be published. Required fields are marked *