QAnon cu ziang a si? Ziangtin a thok? Ziangvek zumnak an nei?

2020 US rampi hrilawknak thawn pehparmi cahram tinkim deuh thaw ah QAnon timi kan hmu ding. Ram tinkim ih cuan mi Capitol Hill luhcilhnak ih hmaihruaitu QAnon kawr hruktu khal kan hmu cio ding zum a um.

Ziangruangah QAnon hi hilawmam in an lar? 2020 US hrilawknak thawn pehpar mi ah an hmin rel telh tengteng ṭul dinhmun tiang an thleng ban thei ih, Leitlun ramtinkim ih pabik a si mi US ram thu ngaihventu cun an thuhla kan theih a ṭul ti`n kan ruat. Curuangah QAnon hin ziang vek zumnak a nei? Ziang duhsan in a cangvai? Ziangtikin a thok? timi pawl cu media tamzet kan zohṭhim hnu ah a tawizawng in kan run tarlang.

QAnon cu ziang a si?
QAnon timi cu a dik lomi le rin tlak loih ruahmi hram mumal neilo, politic lam luan tuk ih phiarsawmnak rin dan (far-right conspiracy theory) suahpitu a siih, an mai rin dan ahcun Cabal of Satan-worshipping pedophiles timi nauhak tisa cakhiarnak neitu, Satan biaktu asimi politician pawl in Cabal do rerotu US president Donald Trump cu an phiarru tum/rero ih zahmawh lamih nauhak zuarnak cu leilung pumhuap in an tuah tiah zumnak an nei.

An simmi tlangpi bik cu Pu Trump hin “Storm” (Thlipi) tiih an kohmi nipi hrangah a timlam aw ih cumi ni ah cun Cabal (politic pehpar ih thupte phiarsawmnak ih thurualaw pawl) mi thawng tampi cu kaih an si ding an ti. Cuvek phiarruknak thurin cu thu dik ih ṭhumawmi a um lo.

QAnon dinpitu pawl cun liberal Hollywood lemcangtu pawl, Democratic politician pawl le cozah lamih sinak sang pawl cu Cabal member pawl an si tiah an zum.

Cuihleiah, Pu Trump in zahmawh lamih minung zuarnak pholang dingin le Barack Obama, Hillary Clinton, George Soros te pawl in a thuneihnak an lawng dingmi lakih kilhim awnak ding ah phiarruknak tuah vekih langawter in Russia thurualpi vek ih umawter dingin Robert Mueller cu hmanrua ah a hmang a si an ti. (Atak ahcun Robert Mueller cu kum 2016 US hrilawknak ih Russia hrolhawnak thu zingzoitu FBI director rak ṭuan dah tu a si.)

QAnon phiarruknak thurin hi Russian pawl ih control mi mipi cawhbuainak hrang ih tuahmi account pawl ihsin Social Media lamah an thangkhawk ter vivo mi a si.

QAnon ziangtin a thok?
QAnon cu kum 2017 ah a tuahtu bik theih a si lo mi thlazuk pawl tarih thu relkhawm theihnak imageboard 4Chan in a thok. A tuahtu cu “Q” ti a siih, America mi mipakhat a si ding an zum.

“Q” hi cozah lamah sinak sang a neimi Q clearance (Cozah thuthup ziangkim luhtlang theihnak, nuclear ralthuam tiang thamban), Trump Administration sung muril le amah dokalhtu thu thup pawl theihtheinak neitu sivekin an rel.

“Q” thawn pehpar in NBC News le media tamzet cun hitin an phuang, “Q” hnen ihsin thusuakmi laksawngtu mi pathum an umih, an nih hin media platform (internet) dangdang ah thehdarh in sumpai hlawknak ah an hmang a si a ti. 4Chan ah hin thu post ṭheutu zo a si ti theilomi an um ih cu pawl cu FBIAnon, HLIAnon (A sunglam insin tuantu Sinak Sang neimi), CIAAnon, le WH Insider Anon tiah an ko aw. QAnon hi America ihsin a thokmi a sinan, an cangvaihnak cu US lenglam ah siin, abikin Europe sung ah a si tiah ruah a si.

QAnon thluntu pawl hi August 2018 ih Trump reelection campaign rallies ihsin langsar in an suak thawk. Broadcast tuahtu Bill Mitchel timi, QAnon khaisangtu cu White House “social media summit” tuahnak ah July 2019 ah a tel. QAnon thluntu pawl hin atlangpin social media ih thil an post tikah hashtag #WWG1WGA cu an thuken khihhmuh nakah an hmang. “WWG1WGA timi cu Where We Go One, We Go All tinak a si”

August 2019 ih Rally neihnak ah mipa pakhat cun himi QAnon thuken hmang in mipi a forh phur ciamco ih, lehhnu ah QAnon khihhmuhnak a si lo tiin a pheh sal. Cumi cu FBI pawl in QAnon ih duhmi cu ramsung ralhrang (domestic terroism) a si tiih theihternak an suah hnu nazi reilote hnu ih a pheh salmi a si.

America ram thawn pehpar mi thuthang phuang ṭheutu Media ṭhenkhat ih khaikhih dan ah, October 2020 tiangah, Trump hin QAnon message pawl hi a mal bik vei 265 lai twitter in a share sawng. QAnon pehtlaihmi Twitter Account cu voi 152 lai a tar lang. Nikhat ah veitam nawn a tuah caan tla a um ti a si. QAnon thluntu pawl hin Pu Trump hi “Q+” tiin hmin an pe.

QAnon dungthluntu/zumtu pawl hi ziangzat ciah an si ti theih a si lo, Asinan an group hin online ih thluntu tampi an nei. June 2020 ah khan Q cun “digital soldiers oath” (ralkap vekin sesam ih tiamkamnak) a tuah ter ih, mitampi in an tuah, cumi cu Twitter ah hashtag #TakeTheOath (Sesam tiamkamnak tuahaw) ti`n an hmang.

July 2020 ah, Twitter in QAnon thawn pehtlaimi account tampi a phit sak ih hram mumal neilo phiarruknak thurin thehdarh tam thei lo dingin algorithms a thleng. Facebook lamin an khaikhih danin August thla ah khan facebook group le page tampi ah QAnon thluntu hi millions lai an hmu ih, a thla leh ah cun Facebook in QAnon cangvaihnak hlawnsak le vangvaihnak kham dingin a cang vai, cule October ah phiarruknak thurin tuahmi hi Facebook ihsin an phit thluh.

Curuangah QAnon thluntu pawl cu message tarnak hmunpi dang ah an ṭhawn ih EndChan le 8chan (tu ahcun “8kun” tiin an tuah sal) timi an hmang. Cuih hmun in khatlam ih an ral pawl dodalnak thu an suah ih, tu ah, 2020 US president hrilawknak ah tumtah nei in an cangvai.

Zohṭhimmi: Wikipedia, NBC News, AP, Politico, BBC, Fox News

Leave a Reply

Your email address will not be published. Required fields are marked *

error: hahahahahaha !!