Pu Ziona tei` innsang ah Covid 19 natnak a karh thok

Kan dung June 13 ih mual liam, leitlun innsang tumbik world record neitu Pu Ziona tei` innsang ah Covid 19 natnak a karh thok ih a fapa upabik telin mipum 12 an positive.

Pu Ziona (kum 75) cu Chana Pawl/Chhuanthar Kohhran timi biaknak hruaitu a si ih June 13 ah Tlangnuam khua (Baktawng) ih um a dungthluntu/kohhran member 2000 luan, a nupi 39 telin a fa le tu 200 kim zik tanta in mual a liam.

“Chhuanthar Run” timi innpi ah a tantami nupi fanau pawl cu an khuasa ih an umnak vuakvel ah Covid 19 nat nei an um ruangah July 23
ah Mizoram harhdamzung ṭuanvonei pawl in Covid nat an va check tikah mipum 12 in nat an nei mi an hmusuak a si.

Mizoram harhdamzung ih ṭuanvonei mipakhat cun “July 15 ah Pu Ziona tei` Chhuanthar Kohhran member 3 Covid 19 an positive ih zarh khat sungah positive mipum 163 kan hmu.”

“Tlangnuam ih um Pu Ziona dungthluntu hi mipum 2224 an si. July 23 ah mipum 1255 nat check nak kan nei bet ih Pu Ziona innsang member mipum 12 telin Covid 19 positive 80 kan hmu. Tutiangah Chhuanthar Kohhran member mipum 243 an positive” a ti.

Tudinhmun ah Mizoram ah Covid 19 mina 33,452 hmuhsuah a si zo ih damsaalzo 23,811 le mithi 137 an um zo a si.

Leave a Reply

Your email address will not be published. Required fields are marked *