Pu Trump thusimlai A Kut vei dan cu nasaten an buaipi

US President Donald Trump ṭantu pawl in Kum 2021, January 6 ih Capitol innpi an siim thuthawn pehpar in le hmailam ih thil thleng lai ding thuthawn pehpar in tolai US President Donald Trump in January 14 ah thucahtawi simnak a nei.

Pu Trump cun Capitol innpi siim thu cu a tumtah mi thawn a pialaw bepbep thu le a ra lai dingmi tikcucaan khal ah thahrum hriamhrei hmangih cangvai thei dinhmun a si mi a dungthlun pawl cu remdai zetih um dingin forhfialnak a nei.

A thusim lai video cu Leitlunhuap mipi in an rak thlir cio ih US rampi hrilawknak ih buaihram ṭannak muril pakhat a si mi QAnon zumnak thluntu pawl khalin an rak thlir ve.

QAnon pawl cun Pu Trump thusim lai video minute 4:20 ciah ih a kut vei dan cu awaan suak lo biakawdan Morse Code a si an ti. Pu Trump in a dungthlun pawl cu mizaran theithiam lo dingin in pehtlaih ti`n zumnak an nei.

“Pu Trump account telin QAnon zumnak khaiso phorhsuaktu tamsawn cu social media ihsin hnon hlo an si. Cuiruangah a mipi pehtlaihnak a nei thei sun cu tuvek caan lawng hi a si. Curuangah mizaran theithiamlo dingin in pehtlaih a si” tiah an ruat. Cuihtlunah Pu Trump in US cozahpi cu a dodal hrih lai ih cangvaihnak hrang hmalak khuakhannak a nei hrih lai ruangah tuvekin 19th century lai ih an hman zetmi ṭongthup phunkhat (Morse code) hmangin in pehtlaih a si an ti.

Cumi thuhla cu Great Awakening timi QAnon forum pakhat ah reltlangnak an nei ih QAnon le far-right tamzet tlanlennak Telegram khal ah nasaten an rel.

Pu Trump thusimlai video minute 4:20 ciah ih a kut vei mi cu “dash-dash-dot-dash” ti a si ih Morse code in cu Q tican a si. Cumi cu Pu Trump in ruahsannak dang a um lai ti in sim theimi a si tiah zumnak an nei ih hmailam tikcucaan khalah Pu Trump ih cangvaihdan cu mitṭhep loin an thlir ringring tum a si.

QAnon suah kum?
QAnon cu kum 2017 ah a tuahtu bik theih a si lo mi thlazuk pawl tarih thu relkhawm theihnak 4Chan in a thok. A tuahtu cu “Q” tiah hmin a pe aw ih America mi mipakhat a si ding an zum.

Ziangvek zumnak an feh pi?
An nih hi a dik lomi le rin tlak loih ruahmi hram mumal neilo, politic lam luan tuk ih phiarsawmnak rin dan (far-right conspiracy theory) suahpitu an si.

Liberal Hollywood lemcangthiam le Democratic politician pawl cu setan biak an si ih nonal dingin nauhak thisen an in ringring tiah zumnak an nei.

Cuihtlunah Leitlunhuap nauhak zuarnak (nupa sinak hmanpi le an sa ei dingin) pawlkom lakih telve an si tiah zumnak an nei ih cupawl cun Pu Trump an phiarsawm ti`n an zum. (An zumnak cu hram mumal neilo hlir an si.)

“Cuih setan biak pawl ih phiarsawmnak cu Pu Trump in a neh neknek leh ding. Cumi nehnak a co dingmi nipi hrangah Pu Trump hin atufang ah hmalaknak a nei rero tiih an ruat a si.

Ziangtin an lar thok?
Ngaihsaktlak khal ih ruahmi an si lo. Nan, Pu Trump in QAnon zumnak thluntu pawl ih cathlahmi le an zumnak an phorhsuak mi pawl cu Twitter ah a share ṭheu. Cumi cu an lar nak hrampibik a siih 2020 US rampi hrilawknak ih buainak hram muril pakhat suaktertu le Capitol Hill siim ṭum ih hmainorbiktu ah an hung cang. (October 2020 tiangah, Pu Trump hin QAnon zumnak phorhsuakmi cu Twitter ah a mal bik vei 265 lai a share sawng ih QAnon thawn pehtlaihmi Twitter Account cu voi 152 lai a tarlang. Cumi cu Twitter ihsin an hnonnak hrampi pakhat a si.)

QAnon thuhla kimciang na siar duh le hinah hmet : QAnon cu ziang a si? Ziangtin a thok? Ziangvek zumnak an nei?

Leave a Reply

Your email address will not be published. Required fields are marked *