Prime Minister Narendra Modi Office innpi zuar thuptu Misual 4 kaihkhih an si

UP, Varanasi khua ih India Prime Minister Narendra Modi ih office innpi cu misual 4 in online ah zuar in thehlarnak ah a zuk an rak tar.

Varanasi khua ih PM Narendra Modi office innpi cu room 4 le bathroom 4, sqft 6,500 a kau ti in OLX online marketplace ah an tarlang ih a man ah Rs 7.5 crore (1,372,663,002.75 Myanmar Kyat) an ngen.

OLX online marketplace thehlarnak ID 1612346492 PM Modi office innpi cu Laxmikant Ojha timi hmin thawn ‘House & Villa’ categories tang ah tarlang a siih “itkhun 4, bathroom 4 a um ih bungrua a um cia ṭhepṭhep. Duh tikah luah a ngah cih” ti`n ca an ngan cih.

Palik in thuthang an dong veten misual cu hawl cih in OLX ih tar mi PM Modi office innpi zuk pawl khal an hlawn ter cih.

“An zaten kan kaingah zo. Gurudham Colony ih Prime Minister Narendra Modi ih office innpi zuktu khal kan kai cih ih an zaten mi pali an si” tiah Varanasi palik ṭuanvonei R.K Sharma in ITP hnen ah a sim.

Palik lam cun an thuhla zingzoi pehnak an nei vivo tum ih hih thuthawn pehpar ih hrolhawtu dang an um bet a si le kaihkhih an tum bet thu an phuang a si.

Leave a Reply

Your email address will not be published. Required fields are marked *