Presidential Inauguration Ni ih Pu Trump tel tum lo nak san

2020 US rampi hrilawknak cu mualphonak, buainak tintian thawn tuhrihtiang fehtlangpi rero a si ih President thuneihnak hlanaw ni cu January 20 ah tuah an tum.

Cumi ni ah US President Donald Trump in a tel tumlo thu kan dung baite ah a relsuak dah ih cumi thuthawn pehpar in Pu Trump naivai ih hnaṭuan mipakhat cun ramsung media hnen ah simfiahnak a nei.

US media ṭhenkhat ih tarlandanvek a si le thuneihnak hlanawkni ih Pu Trump telduhlo naksan cu ex-President dinhmun in US Tlangbawi zungpi a suahsan duhlo ruangah a si ti`n US media ṭhenkhat in an tarlang.

“US President dinhmun in White House thlanglam tualrawn in Marine One helicopter thawn White House a suahsan tum. Cumi hrangah mipi telpi in hluanghlai ropi zetih thlahawknak tuah thei dingin hmalaknak an nei rero lai” tikhalin an tarlang a si.

Khawilam pan in a suak ding ti cu theih a si lo nan a hlan ahcun Scotland ram lam pan in Golf a thawi tum tiah thuthang a suak. Cumi thuthang ruangah Scotland cozah lam in Covid boruak ruangah an ram ah an lut siang lo ding thu, thuthannak an nei phah thluh.

US President thuneihnak hlanawnak cu 1937 kum ihsin January 20 sunhnu ah hmantlangpi a si ih suaklam President khalin an telpi ṭheu.

Wikipedia ih tarlangmi vek a si le US President san thuanthu ah thuneihnak hlanawk ni ih tellotu US President minung 3 lawng an um lai.

Tuṭum, thuneihnak hlanawknak ah Pu Trump in a telpi ngai lo a si le “US President san thuanthu ih thuneihnak hlanawk ni ih tel theilo US President palinak” tiah US thuanthubu ah an ngankhum camcin ding a si.

Leave a Reply

Your email address will not be published. Required fields are marked *