President Vladimir Putin todingmi Vanzam sung ih Ceet thilri an fir

Russia rampi hruaitu, mithupi ralbawi pawl hrang ih tuahmi Doomsday Vanzam sungih ceet thilri mankhung ṭhenkhat a hlo ruangah a firtu kaisuak dingin Russia palik in zingzoinak an nei.

Doomsday Vanzam tikhalih koh mi National Airborne Operations Centers (NAOC) Vanzam cu Nuclear ralpi a tho tikah Russia cozah mithupi ce pawl to dingih ṭhahleicuang ih tuah mi a siih Russia ramsung ah Doomsday Vanzam pali lawng a um.

“Doomsday vanzam cu Cold War lai ih hmanmi Ilyushin Il-80 remsalmi a siih Vansang ihsin olsam zetin satellite control theinak, tipi sung ih Nuclear phurtu Lawngpi control theihnak, radio signal malte lawng suakternak, electromagnetic pulses kham theinak antennas tivek pawl bun ṭheh a siih Nuclear ralpi a tho khalle him zetin Vanpar ihsi leitang ih ceet pawl control thei dingih tuah mi a si” tiah Vanzam pilot hrang ding interview an rak tuah ṭum ah Doomsday Vanzam thuhla cu Cozah ṭuanvonei mipakhat in Reuters hnen ah a rak sim dah.

Cuih Vanzam cu kandung Tlawngkai ninga ah remṭhasin dingin Rostov region, Taganrog khua ah zohciangnak an nei ih a sung lam an zoh ciang cu electronic unites 39 lenglo a rak hlo. Vanzam sung zohciangnak an nei sin bet cu a dunglam thilphurnak lam ah sangkate bohnak an hmu.

“Ceet tuahnak ih hmanmi bungrua ṭhenkhat cu rei awh dingin sui le platinum an hmang tel mi a um. Curuangah an fir mi siding. A hlo mi thilri cu 1 million roubles ($13,600) man hrawng a si. Tu ah, palik in zingzoinak an nei lai” tiah Kremlin Press Secretary Dmitry Peskov in ramsung reporter pawl hnen ah phone thawn a sim.

Russia ram hin a rampi humhim dingin ralthuam billion tamzet man a lei nan tuṭum ah an ram hrang Vanzam thupizet pakhat a simi cu fifir pawl in olsamten an boh thei cu Russia military facilities pawl hi rinsan a tlak ngai pei maw ti`n thusutnak a um tiah AVN in a ngan a si.

Leave a Reply

Your email address will not be published. Required fields are marked *