Portugal Nurse nu cu Covid 19 vaccine a dawt hnu ni 2 ah rinlopin a thi

Leitlun ram ṭhenkhat ah Covid 19 vaccine an dawt thok rero thlang ih sii dawt ruangah side effect tuarlo/suaklo dam kelkel an um vekin taksa bol, khuasik luna tuar khal an um.

Portugal ram khal ah Pfizer tuah mi Covid 19 vaccine cu Harhdamnak lam hnaṭuan pawl an dawt thok. Cumi ah Porto khua, Portuguese Institute of Oncology ih hnaṭuan nurse nu Sonia Acevedo cun vanduainak a tong ih Covid 19 vaccine a dawt hnu nihnihnak ah rinlopin a thi.

Amah hi kum 41 mi a si ih Portugal ramsung media ṭhenkhat ih tarlang mi vek a si le damlonak dang ziang hman a nei lo. Cuih tlun ah vaccine dawt pawl ih tuar tlangpi mi taksaa Luna tivek khalin a um lo.

Acevedo pa cun “amah hi mi hrisel a si ih aipuang hnisiamsi ten a um ringring. Zu khal a in dah lo. Ei le in lam khal ah mi pangai a si”.

“Pfizer le BioNTech tuah mi Covid 19 vaccine a dawt hnu khalah side effect a tuar lo. Nan, rinlopin nihnih hnu ah a thi. Ziang a cang ti khal kan thei lo. A thih naksan theisuak ka duh rori. Mi pakhatkhat talin in simfiang ṭul” ti`n ramsung media hnen ah a sim.

Sonia Acevedo cu an ramsung ih Pfizer-BioNTech vaccine dawt hmasabik lam Porto IPO hnaṭuan mipum 538 lak ih telve a si ih a thih dan cungcang cu Cozah lam in zingzoinak an nei rero lai a si.

Portugal ram cu mipum 10 million luan umnak rampi a si ih Covid 19 case 427,000 um mi ah minung 7,118 an thi a si.

Leave a Reply

Your email address will not be published. Required fields are marked *