Politician le Palik tivekmen cu ka Kawr Zaal ah ka PAAI men – Vikas Dubey

India: Uttar Pradesh ramkulh gangster mipum 60 hrawng le palik 30 kahawhnu zarhkhat hrawng ah gangster hruaitu Vikas Dubey cu Madhya Pradesh state ih vaai biakinn kiangah palik pawl in an kaai.

Cuih hmun ihsin a umnak U P lam an panpi laiah mawtaw a cangsual ih an let. Vikas cun palik pai` meithal a laksak ih tlaan a tum. Culaifangah palik pa in meithal thawn a tin ih Vikas in a meithal a thlah duhlo ruangah palik pa cun a kaap ih hliamhma nazet tuar in siizung lam ah an tlaanpi. Nan, siizung an thlenhnu reilo teah Vikas cu a thi a si tiin palik in an phuang.

Madhya Pradesh,: July 09, gangster Vikas Dubey palikzung ih an hruai tum lai

Asinan U P palik nunraawng zia theitu India mipi le media pawl cun a mah thawn hnaṭuan tlaang, sual tuah tlaang politician pawl ih hmin a phung pang ding an phan ruangah a kaa an phit siding tiah an zum.

PALIK 8 THIH NI
Palik pawl cu Vikas Dubey kaai dingin a umnak khua Bikru, Kanpur ah an feh ih a umnak inn hruang an lut veten misual pawl in inn par, siirlam le dunglam ihsin meithal in an rak kaap.

Zohman suakmanlo dingin an dunglam ihsin an kulh ih an mah duhsahten meithal thawn an ziit. Palik 8 an thi ih palik 7 in hlimhma an tuar. Duhtawk ih an kaap hnu ah misual hotu Dubey le ho pawl cu a khuahkhuah ten an tlaan hlo thluh.

Uttar Pradesh Deputy Chief Minister Keshav Prasad Maurya in Palik thi 8 upat pek lai

Palik an thlenhlan ihsin an umnak hmun ih an rat ding thu, an dong cia ih, kaap dingin an man cia ṭhepṭhep ruangah palik pawl an cangmanlonak a si.

Thuthang ṭhenkhat ih nganmivek a si le misual pawl hi mipum 60 hrawng an siih palik 30 hrawng an si. Palik mipum 8 thi mi pawl lakah an hotu pakhat a telve. Cu pa cu meithal in an kaap hlei ah hreitlung thawn a hngawng an sat bul tiin Post-mortem tuahtu pawl cun official in an phuang.

An kaap aw ṭheh hnu thuthang a suak veten India cozah in palik team 25 a thlah ih misual pawl cu an hawl thok. An kahawhnu nazi 4 sungah misual pawl lakih telveding an zummi, misual hotu Vikas ih sungkhat Prem Prakash Pandey le Atul Dubey cu palik pawl in an kaap that. Vikas ih inn le motor pawl khal bulldozer hmang in an nor siat ṭheh.

Palik in an thuhla umdan zingzoinak an nei thok cihih Vikas kaai dingih an feh hlan ciah ih misual pawl thuthang rak sim thuptu palik officer Vinay Tiwari le K.K. Sharma khal an kaai ih thawng an thlak.

U P ramkulh khal zohman lutsuak theilo dingin cozah in a seal thluh ih misual pawl hawl dingin Special Task Force le palik team 25 (zatekom taem 50) a thlah bet.

Palik le Special Task Force pawl cun Vikas ih neimi zu dawr, offcie, inn le lo, a sungkhat pawl umnak hmun khalah an hawl ṭheh nan an hmu theilo.

Palik pawl in Bulldozer thawn Vikas Dubey inn, motor pawl an siat sak

A kut hnuai ih hnaṭuan pawl khal an hawl ih misual pawl lakih bawibik sangtu, Vikas Dubey ih sungkhat thotho Amar Dubey khal Special Task Force pawl in an kaap that.

Athih thuhla, a sungkhat hnen ih va sim dingin an feh laiah an kahthatmi Amar Dubey ih pa, tuhlan kum 7 rei ah a thi zo an timi Sanjeev Dubey a dam lai thu lamlam khal an va thei suak. A umnak hmun ah palik pawl in an va kaai cih. A nih khal misual thotho a si. Mithattum, palik station boh, le thilfir tvp thawn pehpar in case 12 lai neitu a si. Tuhlan kum 7 ah accident a rak tong ih a ke a bul. Cuih ṭum ah a thi zo a si tidingin a sungkhat pawl a phuang fial ruangah palik pawl khalin a thi taktak ah an ruat mi a si.

Vikas Dubey ih lieutenant Amar Dubey

Misual bawi Vikas Dubey ih rinsanzetmi Prabhat Mishra khal Faridabad ah an kaaingah ih an kaap that. Mangbang thlak takin, an kaapthatnak hmun cu gangster hotu Vikas Dubey thihlehnakding hmun (palik pai` meithal a lak ih a tlaan tum an tinak hmun) thotho ah a si.

Palik le Special Task Force pawl cun misual bawi Vikas cu an hawl pehzom vivo ih UP ramleng, hotel pakhat ah a thleng tin thuthang an dong. India Cozah ih seal zomi U P ramri lenglam Faridabad ah a rak thleng zo. Palik pawl hotel an va thleng ahcu a rak um nawn lo. CCTV sung lawng ah an hmu.

Vikas Dubey tlaan lai ih CCTV zuk ngah mi

Cuih hmun ihsin Ujjain lam ah a lut saal ih tlaawngkaai ni 4 zinglam ah Mahakaal temple kiang ah a hmin a phuangaw hnu ah palik pawl in an kaai.

Palik zung ih an hrui hnu ah a umnak Uttar Pradesh ramkulh ṭuanvoneitu kut ah an up. Cuih hmun ihsin U P palik pawl in an tlunpi ih lamziin ah buainak a suak ih an kaap that a si.

GANGSTER VIKAS DUBEY THUANTHU TAWI
1964 ah a piang ih Uttar Pradesh, Kanpur Dehat district ih um a si. Kum 20 a si hlan ihsin voitamzet thawng a tlak ih tu ni tiang sual tuah ruangah official in case 60 luan a nei.

GANGSTER VIKAS DUBEY

Kum 16 hrawng a si lai ah an khawsung ah nasa zetin mi a thawi. Thawng an thlak nan politician Harikishan Srivastava in a runsuak. cuih ṭum ihsin sual lamin le India cozah hnaṭuan rori ih bawm/ṭan mi a si ruangah a hmin a thang thok.

Politician pa cun ramkhelnak hmanrua ah a hmang ih a ral pawl khal a thatter. Dunglam ih bawmtu a nei ṭhatuk ruangah le U P palik nawhthuh a pek ringring ruangah zo hman in an daai ngam lo.

Mi inn le Lo ram khal a lawng ih thawng an thlak khalle a suak cingcing. Riruang ṭha deuh a rualpi palik nupi khal a ihpi nan ziang hman an ti ngam lo.

1995 hrawng ihsin politic a khel thokih thawng a tlak lai ah district level in election ah nehnak a co. A nupi Richa Dubey khal politic lam ah a hrolhaw veih a pasal thuneihnak ruangah local election neinakah nehnak a co ve.

Cutin politic lam khalah a telve lawk nan a ruah vekin a hlawh tling lo. Nan, UP ramkulh ih cozah thuneitu tamsawn cu a zaal ah a paai thei. U P cozah in a mawi nakah le mipi hmai ah lemcangin a lu man ah Rs 5 lakh an ngen. An hua thluahthlo khalle Vikas thawn sual tuah nakah thuktukih an telzo ruangah suahsaal a theih nawnlo.

2001 ah palikzung sungah BJP party a simi State Minister Santosh Shukla a that. Cuhlei ah palik 2 khal a that tel. Cuih ṭum khalah kum 1 lawng thawng a tlak.

BJP logo leh MODI

2017 kum ah kaai lo theihlomi thuhla ruangah thawng a tlak ih Uttar Pradesh cozahpi in Gangsters Act le Anti-Social Activities (Prevention) Act in taya an suai nan HighCourt ah a khiing let leh ih nehnak a co.

Cutin, hlan lai ih thil sual a tuah mi pawl ruangah kaai dingin a inn ah an va siim ih an mah palik pawl sawn riangri an rak kaap ih palik 8 an thi. Cuhnu in India rampi cozah in a hual lawlaw ih July 9 ah Ujjain, Madhya Pradesh, Mahakaleshwar Jyotirlinga temple kiang ah an kaai.

“Palik kut ah a thi ding a zumawcia ruangah an kaai lai ah a hmin napin a au” tiin a thuhla thei deuh pawl in an sim. Media hrekkhat khal in a rualpi pawl vekin accident lole cangsualnak ruangih thi vekin in that ding ti a thei cia ruangah a hmin napin a au a si an ti.

An kaainak vaai biakinn kiang ihsin palik zungah an hruai hnu ah a umnak U P ramkulh cozah hnen ah an up. An tlun lam ah accident nak a suak ih siizung ah a thi.

“U P lam pan ih kan tlun laiah motor kan accident ih kan rualpa meithal cuh in a tlan tum ruangah kan kaap a si” tiin palik lam cun an phuang a si.

ref:wiki,TOI,IT,TheHindu

Leave a Reply

Your email address will not be published. Required fields are marked *