Rebirth Theory zumnak neitu Nu le pa in an fale Raaithawinak ah an hmang

Thlarau thawhsalnak (Rebirth Theory) timi zumnak neitu India rammi nupate cun kum 27 le kum 22 mi an fanute pahnih cu January 24, zarhpi zaan ah thirtum thawn an thawi that.

An fale pahnih cu hindu biaknak thawn pehparmi “sat yuga” ni ah an thosal ding timi zumnak an nei ruangah a si tiah TOI in a tarlang.

Upa sawn Alekhya (kum 27) hi fimthiamnak lamah Master degree ngah zotu a si ih nauta sawn Divya (kum 22) khal BBA ṭhehsuakzo a si.

Divya cu Leitlun huap awnmawi khawvel ih hminthang AR Rahman ih Mumbai Tlawng ah fimnak zir rero lai a siih, Kum 2020, Covid boruak lockdown hrawng khan Shiva Nagar ih um a nu le pa hnen ah cawlh hahdam dingih va tlung a si.

An inn kiangkap um pawl ih simdan ah Innsang nu le pa hi Lockdown ṭan hrawng khan an umdan a danglam thok tiah an sim. Veng hnen kiangkap thawn pehtlaihawknak nei duh loin an um ih an sungkua in inn leng an suak dah lo ti a si.

“Fa le vuak thattu Padmaja le Purushottam cu phunsang Tlawng ah Tlawngsaya le Tlawng sayagyi dinhmun ih hnaṭuan an si” tiah Andhra Pradesh, Madanapalle khua ih palik ṭuanvonei DSP Ravi Manohara Chari in a sim.

Amah cun “Shiva Nagar veng in phone call kan dong ih a hmun kan va thleng cu thi le hnai thawn an khat. Ruang pakhat cu pathian biaknak khaan ah thi le hnai lakah a rak um. Pakhat sawn cu khaan dangah a um ih puan sen thawn an khuh. A par ah pathian biaknak ih hman ṭheu mi thilri khal a um cih” tiah a sim hrih.

Kiangkap veng hnen pawl in thawmvang danglam zet an thei ruangah palik an phone lohli ih palik an va thlen cu Innsangpa le nu in innsung luh an sianglo. Caan tawkfang an buai hnu lawng ah innsung an lut thei.

“pathian in kan fale raithawi nakah hmang dingin in sim an ti. Tuini hi ‘Kali Yuga’ nitawp ni a si ih Tlawngkai nikhat zing ‘Satya Yuga’ ah an tho sal ding ti zumnak an nei. Curuangah an ruang pawl cu innsung ihsin phorhsuak hrihlo dingin in dil” tikhalin DSP Ravi Manohara Chari in a sim hrih.

Atuah, fale vuak thattu Purushottam te nupa cu palik kut sungah an um ih thuhla umdan zingzoinak an nei vivo tum. Zingzoinak an nei mi ah an mawh ti an hmusuak le an nupa in damsung thawngthlak thei dinhmun an si.

Leave a Reply

Your email address will not be published. Required fields are marked *

error: hahahahahaha !!