Phukpi thawn Nau neih nak Siizungpi an kap

Ukraine : Russia ralkap in Mariupol khawpi an kulh nak ni 2-3 a si thlang ih, Ei-in Siivai phurh thiar an kham thluh hlei ah nauneihnak Siizung cu phukpi thawn an kap.

Kahdo cawl lawkin hmun him ah mipi tlanter dingih lungkimnak an nei hnu ah rinlopin nauneihnak Siizung an kap.

“Siizungpi an bat hrim. Direct rorin an kap ih lungto tlakrawhkuai le inn siat mi hnuai ah naute le nau nei pek nupinu pawl an tang” tiah Ukraine President Volodymyr Zelensky in a rel ih “ziang tik tiang so leitlun mipi in hnaset in tun ding” tiah a ti.

Ukraine MP Dmytro Gurin khalin Mariupol khawpi dinhmun a ṭha lo thu a rel ih “mithiruak cu lamzin ah an darh thluh ih, a burbur ih miruak phum nak ding thlankhur laih ṭul dinhmun kan thleng” a ti.

Bomb puak le doawknak ruangah Mariupol thlanmual an hmang theilo hlei ah, ei-in siivai supply nak ding zinkong hmuahhmuah cu Russia ralkap in an phit thluh.

“Russia in kan ram in luhcilh hnu, tu ni tiangah Mariupol sung lawngah khawmi 1170 an thi zo ih, mithiruak 47 cu tuni rori ah a burbur in kan phum. Tidai, meisa, gas tivek ziang hman a um lo ih hmun ṭhenkhat ahcu Vur tii terin, cumi hang an in” tiah deputy mayor Serhiy Orlov in a rel ve.

Mariupol khawsung nau neih nak siizung an kap thu thawn pehpar in media pawl in Russia thu an sut tikah, Kremlin spokesman Dmitry Peskov cun “kan ralkap pawl in mipi an kap lo” tiah a ti.

Leave a Reply

Your email address will not be published. Required fields are marked *