Ph.D degree nei cing in Lamzinkaap ah Thingtheirah A Zuar Ṭul

Thing-thei, hanghnah hangrah zuartu, mirang ṭong mawi, tluang zetih ṭongtheitu nunau pakhat ih video cu kan dungzarh hrawngah online ah a lar ciamco.

Video an zuk mi ahcu “Covid 19 ruangih Lockdown an tuah mi nih, niicaa ei hnaṭuan pawl a ti harsa zia, an mah vek thing-thei hanghnah hangrak zuar pawl a ti zawnzai zia le sungkua cawmnak dingin paisa laklut nakding a um lo zia pawl cu India cozah in ngaihsak lohli dingin a sim ih mirang ṭong mawi, tluang, famkim zetin a sim.

“Mirang ṭong a thiam hlei ah tluang zet ih ṭong thei cingin, ziangah hnaṭuan ṭha a hawl lo maw si? tiin thusutnak a um ih, an zingzoi tikah Indore, Devi Ahilya University ih Ph.D degree ngah zotu Raeesa Ansari a rak si ziar.

Indore, Nehru Nagar ah a nu le pa, a unau pawl telin innsungsang member 25 thawn ummi an si ih Belgium ram ah research hnaṭuan dingih sawmnak rak dong zotu khal a si.

Hnaṭuan ṭhazet a rak nei nan an mo pawl in a unau pawl an tlansan thluh ruangah an fa le pawl kilkhawi dingin le, a nu le pa, uu le nau pawl enkol dingin a hnaṭuan a colh san mi a rak si.

Thu a sim lai video rak hmu vetu India media pakhat in ‘Ph.D degree neitu mifim na si fawn, ziangah hnaṭuan ṭha na hawl lo maw si’ ti`n thusutnak an nei ih Amah cun, “a hmasabik ih na sut mi ah, zo in hnaṭuan in pek duh ding ti`n ka lo sut duh sawn. Muslim bur umkhawm in pathain biaknak an nei ruangah India ram sungah Covid 19 a karhzaai timi ruahnak a um kha, na thei ko ding. Ka hmin cu Raeesa Ansari a siih Muslim hmin a si. Curaungah collage, research institution tivek pawl in hnaṭuan in pek duh lo” a ti.

ref:TOI,IT

Leave a Reply

Your email address will not be published. Required fields are marked *

error: hahahahahaha !!