Peru puithiam sim mi US hrilawnak ih Neh nak Co tu ding

US rampi hrilawknak thubuai a sosang vivo ih ramsung ralpi a tho pang pei maw tiin khuaruah donhar an tam zet.

Tu dinhmun tiang cu Biden in hmai a hruai nan Trump in neh nak a co ko ding rak titu khal an um.

Culaifangah Peru ram puithiam pawl ih nehnak co tu ding an rak phuang dah mi video cu a lar ciamco sal.

Cuih video cu September thla ih zuk mi a siih Video sung ahcun Peru ram puithiam in Donald Trump le Joe Biden zuk cu milem hmai ah an thlir ih an mai hnam ti dan ṭheu vekin raithawinak phungpha thawn US ram hrilawknak ih nehnak co tuding an phuang.

Rul le rimhmuai ur mi keng phah in Pu Trump le Pu Biden zuk cu an hel ciamco ih puithiam sinak niam deuh pawl cun khuang le dar an tal ciamco.

Puithiam lak ih mi pakhat cun Biden ka hril sawn a ti ih puithiam dang pakhat cun “curuangah si kan thianfai ṭul. Hnamsia le Daawi phunphun hmang in an do ciamco ih a sinak dinhmun ihsin hlonhlo an tum” a ti.

Cutin, caan tawkmawi sung tuah/ṭong ṭul mi hmuahhmuah an tuah hnu ah “Mr. Donald Trump in cahnak thazang co seh” ti`n an puithiam sangbik Pablo Torres cun a ṭong ih Pu Trump zuk ah a ka ih hmawm mi thil tii a phut ih “ziangruangah kan ti ahcun a phu hrimhrim ruangah a si. Thazang cahnak a mamawh ih a mipi pawl khal in beidong lo in thazang nan pek ṭul. Kan nih khal in ka ṭan pi ih nehnak a co ding. Nehnak cotu a si” ti`n Donald Trump in nehnak a co ding an zum thu an phuang.

Leave a Reply

Your email address will not be published. Required fields are marked *