Pathian direct call theih nak phone no. ka nei titu Pastor Paul Sanyangore

South Africa, Zimbabwe khuapi Harare ih um Pastor Paul Sanyangore cun Vanram direct call theih nak phone number ka nei a ti ih pathian thawn kan biakaw ṭheu a ti.

Zimbabwe ram ih Victory World International Ministries dintu a siih Kum 2017 ihsin Leitlun huap in a hmin a thang thok. A hmin thang ti cu a si nan a ṭhazawng si lo in a danglam zawng ih hminthang sawn a si.

Pathian direct call theih nak phone number ka nei a ti ruangah a hmin a thang ih Biakinn sungah Pathain thawn kan biak aw a ti mi video tawi te cun a hmin a ti thang ter sinsin.

Cuih video sung ih a lang dan ahcun numi pakhat cu khuk a bil ter ih thu sut phah vek, phone thawn pathian biak phah vek in a her kual aw rero ih pathian in, in sim a timi pawl cu a ṭong suak phahphah.

Phone thawn pathian biak phah vek, numi thu a sut phah vek ih a um hnu, a netabik ahcun “Vanram a Online” ti`n a au ih mipi pawl khal an au hluarhlo.

Direct line in pathian ka biak a timi video cu a laar ciamco ih a ninii in a zoh tu an pung vivo. Cutiih a lar vivo cu Zimbabwe news H-Metro in interview nak an nei ih, cumi ahcun, “Mipi hrekkhat in, in zumlo mihi ka mang a bang. Pathian in thil ti theilo a neilo timi hi an zumlo maw si.”

Vanram direct biaknakding phone line ka nei. A ṭul caan ah ka call thei ih a mah in a ṭul a timi tuah ding in, in sim sal. Himi contact hi thla ka cam lai ah ka ngah mi a siih a tikcu kim tik le Pathian call nak direct line cu mipi ka theih ter leh ding a si” tiah Pastor Paul Sanyangore cun a rel.

Amah hi Pastor talent ti`n tla an ko ih tuhlan khalah a kohhran midamlo pawl cu damnak dingah ti`n thlalang kuai, ruul tvk a rak eiter dah ih damnak dingah tiin tuur ṭihnung thawn biakinn sungih mipi pawl khal a rak theh ciamco hai dah ti a si.

Leave a Reply

Your email address will not be published. Required fields are marked *