Pathian cu Siangpahrang a si tiih autu Mibur in California Tlangpar ah Thing Cross an Phun

California, Atascadero khualipi Tlangpar ih phun mi monolith cu Mino rual siding zumummi pawl in an ṭhiatbal ih thing cross an phun.

Thirphun ṭhiatbal lai cu video an zuk ih video sung ahcun Thirphun mi cu mongkuahur khihhmuhnak sivekin mi pakhat in a ṭong ih a rualpa khal in “hih ram ah kan Pathian hi siangpahrang a si. Daan lo in kan ram ih um Mexico alien lole boruak ihsi ra mi alien kan hei lo. Curuangah himi hi ṭhiatbal uh si” a ti.

Thirphun ṭhiatbal dingin nazi 5 sung an feh suak lai cu video an zuk ih dlive streaming website ah CultureWarCriminal timi channel ah an thlah.

Thirphun ṭhiatbaltu mibur cu zo an si tikhal theih a si lo ih video sung ih a lang mi ahcun mipakhat cun Pu Trump MAGA puante a Lu ah a ṭem. Lamziin an feh phah ah le Thirphun an siat lai ah “America First” “Christ is King” ti`n an au phah ih ṭongsia phunzai phah in Thirphun an thluk hnu ah cuih hmun ah Thing Cross an phun.

California Tlangpar ih Thirphun cu ziang a si?

November thlacem lam ah Utah ramcaar ah zoi tuah mi ti theih lo mi Thirphun an hmusuak ih online ah a lar ciamco. Cumi Thirphun “Monolith” cu 2001: A Space Odyssey zuknung sungta cawngin Land Art phungpha ih phun mi siding an zum ih Khuatlang mipi hmunram ah Daan lo ih phun mi a si ruangah Utah adventure tour guides pawlkom in November 27 zaan ah an ṭhiatbal.

Nazi 24 sungah Utah ramcaar ih hmuhsuahmi “monolith” vek cu Romania ram Tlangsang pakhat ah a suak lala. Cumi khal a phuntu an thei lo ih hmuhsuah a si hnu caan reilo te ah an ṭhiatbal lala. Asinan a siatbaltu an thei lo.

California tlangpar ih phunmi “monolith” khal cu Utah ramcaar le Romania ram tavek cawngin an phun mi siding an zum. Tu ah, California tlangpar ih Thirphun cu ṭongkamsia hmang zettu si ih lang mi mibur rual in an ṭhiatbal ih Thing Cross an phun a si.

Leave a Reply

Your email address will not be published. Required fields are marked *