Palik a ṭuan ruangah Meithal kap le Mit khorh A Tuar

Afghan palik Khatera (kum 33) cu Inn suah san in khawtlang mipi lak ih hnaṭuan a ngah ruangah meithal kap le mit ih naamte thawn dawt a tuar ih tu ah khua hmu thei nawn lo in a mitcaw lan ta.

Amah hi Afghanistan central Ghazni province police station ih hnaṭuan a siih a hnaṭuan tlung lam ah motorcycle to minung pathum in meithal thawn an kap ih a mit ah naamte`n an dawt.

“ziangruangah khua ka hmu thei lo’ ti`n doctor ka sut ih hliamhma na tuar nak kan tuam ruangah a si in ti. Cuveten ka mit in siat suah sak timi ka thei suak” ti`n Khatera cun a sim.

Amah le palik lam cun Taliban ralhraang pawl ih cangvaihnak siding an zum nan Taliban lam in inn suah san in lenglam ih hnaṭuan a kham tu a mah pa` fial ruangih khoih tuar sivekin an rel.

Khatera hrang ahcun minung ih kan ṭul bik mi khua hmu theinak a mit sungral lawng si lo in thlathum lawng a ṭuan man lai mi a sunmang Palik ṭuan tiang a can` phah a si.

“Kum 1 sung tal Palik rak ṭuan man seh la ka tuar daan khal a zia deuh ding. Nan, tu ah cu ka sun mang a si mi hnaṭuan ropi cu thla 3 sung lawng ka ṭuan man” a ti.

Afghan cu Islamic ram a si ih biaknak thawn kalhawk tiih ruah mi khawtlang mipi lak ih nunau hnaṭuan dokalh cangvaihnak a tam zet. Khawtlang mipi lak ih hnaṭuan ruangih that tuar nunau an tam zet ih palik ṭuan Khatera khal hin Taliban pawl a ti thinheng zet ding an zum.

Khatera hin a nauhak lai in lenglam ih hnaṭuan fumfe nei ding tumtahnak a nei cia nan biaknak lam ih merh duhtu a pa cun khawtlang mipi lak ih hnaṭuan ding cu a duh lo.

Asinan Khatera cun a hnaṭuan duh zawng lungkimpi theitu pasal a nei ih fa an nei hnu ah palik a hung ṭuan leh. Cutin palik a ṭuan nak thla 3 rei hnu ah vansiat a tong a si.

Khatera cun a hmakhua pit dingih cangvaitu hi a pa si ding a zum. A sim mi vek a si le palik a ṭuan rori timi ciang dingin a pa cun Taliban ralhraang pawl hnen ah palik a ṭuan nak ID khal a rak pek dah ti a si. Vansiat a tong ding ni khal ah a pa in tu le tu phone ciangciang vek in a rel ih ka umnak hmun khal tu le tu in sut rero a si.

A pa cu palik in an kai ih Khatera te sungkua cu a hliamhma hiil ding ni hngak in Kabul khua ah an relh a si. (PKtimes)

Leave a Reply

Your email address will not be published. Required fields are marked *