Pablo Escobar tupa in a Pu paisa thup mi $18 million hmu suak

Bing rang siangpahrang tiih mi theih lar Pablo Escobar ih paisa thup mi $18 million lenglo cu a tupa Nicolas Escobar in phar sungah ka hmusuak ti`n Colombian TV channel Red+ Noticias hnen ah a sim.

Pablo Escobar cu Colombia ram ih Medellín cartel hotu a siih 1993 kum ah palik thawn an kap aw nak ah a thi. A san lai ah Leitlun milianbik 7 nak ih tling ban ve a si.

Rittheih thilri zuar nakin a lian thok ih paisa ret nak ding a nei deih lo ruangah Colombia ramsung hmumtinkim ah a thup ti`n a kut hnuai ih hnaṭuan pakhat cun 2000 kum ah a rak sim dah .

A tupa Nicolas Escobar hmuhsuak mi paisa cu Medellin khuapi ih a inn ropi phar sungih thup mi a siih paisa fai le thilri dangdang thawn $18 million man a si.

Red+ Noticias Tv channel hnen ih a sim mi vek a si le khihhmuhnak (vision) ruangih hmusuak mi vek in a rel. Nicolas Escobar cun “Tuhlan khal ah ka pu paisa thup mi ka hmusuak zo ih tuṭum ka hmu suak dan cu a danglam zet. Rawleinak cabuai ih ka to tinten minung/thlarua vek pakhat cu motor retnak lam pan ih a feh lai ka hmu ṭheu ih a suak sal lai ka hmu dah lo.”

“Curuangah thil pakhatkhat cu a um ko ding timi ruahnak thawn innpi sung ka dap vivo tikah phar dung ih thup mi paisa bag ka hmusuak” a ti.

Cuih bag ahcun paisa tamzet a um. Bag kiang ah sui ballpen, type writer le satellite phones tvk a um ih a zate kom in $18 million man hrawng a si ti`n Red+ Noticias Tv channel cun a phuang.

Leave a Reply

Your email address will not be published. Required fields are marked *