Pa le Pa kopaw (gay) Penguin cun a Voihnihnak Naute an kheu ter

Sydney, Sea Life Aquarium ih vulh mi Penguins pa (gay) pahnih cun a voihnihnak nau thar an kheu ter.

Penguins pa le pa kopaw, Sphen le Magic cun Kum 2018 October thla ah a voikhatnak nauthar an kheu ter zo ih tuṭum hi voihnihnak a si.

Sphen le Magic cun Kum 2018 ah khan, an umnak ih Lungto cu Penguins tii ah ruat in nau an kheuter tum. Bu an sak sak ih Lungto cu Penguins tii ah ruat in an kilkhawi ringring.

An um tlanlendan hmusuaktu ramsa duum kil pawl in nau nei an duh timi thei thiam sak in Penguins tii ngaingai an kilkhawiter ih Lara ti`h hmin pek mi Penguins fate a hung kheusuak taktak.

Sphen le Magic cun an fate Lara cu Penguins nu ih fa le enkol dan vek rorin ṭhaṭen an kilkhawi thei ruangah ramsa dum kiltu pawl cun a dang pakhat an kol ter lala hi a si.

“Penguins nu in tii tamtuk a nei lole a enkol ṭha theilo a si ahcun Sphen le Magic vek, kilkhawi ṭhatheitu hnen ah kan pe ṭheu. An pahnih hin Kum 2018 ah hlawhtling zetin Lara an kheu ter tlun ah an enkol ṭha thei ruangah a dang kan pe lala mi a si. Tu ah Penguins nute a kheu suak zo ih kum 2018 ih Lara vekin an enkol ṭhat kan beisei” ti`n ramsa duum kiltu mipakhat in a sim.

Leave a Reply

Your email address will not be published. Required fields are marked *