Oxygen cianglo ruangah Egypt Siizung ICU ih um Covid 19 mina an thi thluh
Egypt : Ash Sharqia province, El Husseineya Central Hospital ih Oxygen ciangkuanglo ruangah Covid mina besia pawl tuamhlawmnak ICU (Intensive Care Unit) ih um mina hmuahhmuah an thi thluh tiah middleeastmonitor in a tarlang.
Thihhlohnak an ton lai fang cu mi pakhat in video a rak zuk ih cuih video cu online ah a lar ciamco. Video zuktu cun “an thi thluh. Nurse pawl lawng an him dam. ICU ih um mina hmuahhmuah an thi thluh” tiah Arabic ṭong in a ṭong phah.
Midamlo a ni (Fatima Al-Sayed Mohamed Ibrahim (kum 66) a kil lai ah ICU ih um mina besia pawl ih hip mi Oxygen cu zaṭek 2 ah a tlaniam ih thawsam in mina pawl an thi thluh tiah an tarlang.
Video ahcun Siizung ih thil poimawh thleng caan ih a awn ṭheumi thawmgvang thei a theih ih nurse pawl an phar ciamco. Mina enkolnak thuamhnaw hruk Nurse pakhat khal beidong vansang in a kawm te ah a to in a lang.
An buai lai video um cingin Siizung ih ṭuanvonei Dr Muhammad Sami Al-Najjar cun “Oxygen sambaunak tivek zianghman a um lo. Kum upa le damlonak ruangah pangai in an thi mi a si” a ti.
Egypt Health Minister Hala Zayed khalin Oxygen sambau ruangih thi mi an si lo. Muslim pawl in thuthang diklo an darhter hrimmi a si a ti.
Beyond tragic.https://t.co/ATcqS3HgrJ
— Metro (@MetroUK) January 6, 2021
Ash Sharqia governor Dr Mamdouh Gorab in ICU ih mina thi thluh siloin mina 4 lawng an thi a ti ve.
Cozah lam in cutiih puhmawh dingdang hawl in thuthang an suah ciamco cu eiruknak hlir ih khatmi cozah an si zia a langter tiah ramsung media tamzet in an tarlang.
Middleeastmonitor website cun “Oxygen cianglo ruangih vanduainak hi a hlan khal ah Siizung dangah a rak um dah. Tuṭum hi voihnihnak a si. Cun, thuthang kan dong vek a si le Siizung ih video zuktu hi governor Gorab in kai dingin thu a suah ih tu ah zohman in a umnak an theilo” tiah an tarlang.
