Online ih Password leak tambik 20 pawl lakah na Password a tel pang maw! Check lohli aw ….

Mizaran ih kan hmang tlangpi google, Bing, CC Search tivek online search engine thawn hawl theih lo mi “dark web” ah cozah kham mi riitsii, meithal, credit card fir mi tivek thil ciikim cu private in lei a theih.

Daan thawn kalhaw mi thil phunphun zuar theih nak a si bangin online ih leak password tivektiang an zuar ih, cuih hmun ih leak tambik password 20 pawl cu mobile hrang cloud security app tuahtu “Lookout” cun zirzoinak neiin a tarlang.

Dark web ih leak tambik password 20 pawl cu :

1. 123456

2. 123456789

3. Qwerty

4. Password

5. 12345

6. 12345678

7. 111111

8. 1234567

9. 123123

10. Qwerty123

11. 1q2w3e

12. 1234567890

13. DEFAULT

14. 0

15. Abc123

16. 654321

17. 123321

18. Qwertyuiop

19. Iloveyou

20. 666666 tipawl an si.

Siarbet : Password tuah dan na thleng ṭul…..

Kum 2020 ah Netherlands ram mi computer thiamsang hacker Victor Gevers cun US President Donald Trump twitter account a hack sak.

Leitlun rampicang hruaitu pakhat rori ih account hack thei cu a va mak ve ti`n leitlun mipi an mangbang thluh.

Nan, a hack dan ciapciar a suak cu a rak holemtuk. Azum hmangin Pu Trump twitter a rak ong thei men mi a si. A password cu Pu Trump le a dungthlun pawl uarzetmi “maga2020!” (Make America Great Again 2020) timi a rak si.

Sim duh san cu hacker pawl hi Movie sungih kan hmu vekin a tak ah mi password an hack lo. Movie ah cu computer keyborad hmet ciamco in number phunphun lang zutzo hnu ah password an ong thei mi sivekin an langter. Nan, a tak ngaingai ah cu cuvek a rak si lo. Zirzoinak tuahtu le an mah hacker pawl cun password hack mi zaṭek 94% cu phuah cawp in an tuah sin vivo mi a si tiah an rel.

Phuahcawp tikhalah an hack dingmi thawn pehparmi an polkhawm ih an tuah sin vivo ti a si. Tahṭhim nakah na suah ni/kum/thla, phone number le na hmin tivek polhcawk khawmin an tuah sin vivo. Curuangah internet khawvel ih tlanglengṭhang pawl cun an suah ni/kum/thla, an hmin, phone number, sungkhat unau hmin tivek pawl mi theih an duh lo. App tivek kan hmang tikih kan information in sut hmasami khal khi cuvek pawl thawn a pehpar aw deuh lole an hrang hlawk nakah an dil mi a si tlangpi.

US ram ih zirzoi hmuhsuahmi pakhat cu “mi 6 sungih 1 cun a uite, zawhte (pet) hmin cu password ah a hmang” ti a si.

Ziangtin Password kan tuah ding?

Account hack mi thawn cozah sawiselnak tivek an post sak ruangah le mibumnak hrang an hman sak ruangah mawhneilo kaihkhih tuar tivek khal hmuh ding an tam zo ih online ih kan hman mi account pawl hi atak ahcun an rak thupi ve zet. Zianghman ka tuah lo, phan ding ziang hman a um lo na ti lai ah rinlopin account hack sak ruangih ruahbanlo vanduainak tiang na tong thei a si. Curuangah password ṭha lole pol har mi kan tuah thiam a poimawh zet.

Password ṭha tuah dan ……

IT lam hnaṭuan le business tuahtu ṭhenkhat cun paisa pekin Password Generator, Password keeper tivek an hmang ih, bulpak hrangih password him cu olsamten hngilh theih lo mi, nangmah bulpak thawn a pehpar mi pawl hmang theih hi a ṭha.

Ṭahṭhimnakah rualpi midang theih loin athupten mi na ngai zawng thok ni le a hmin polhkhawm tivek…., Rawl hmeh duhlobik le na mitkem zetmi nan veng nu/pa hmin polhcawk …. tivek, mi ruah ban lo ding mi le nangmah na thinlung sungih um mi tivek hman a ṭha. Cun a himbik pakhat cu password thok nakah cafangtum, number tivek lole symbol telh tivek a ṭha a si. (Internet security lam hnaṭuan pawl rel ringring mi cu Password na tuah tikah “na hmin, fanau – unau hmin, innzuat ṭilva hmin, pian ni/thla/kum tivek lawng hmang hrimhrim hlah” ti a si.)

A cang thei cun thla 2-3 ah password kan thleng thei ringring le a ṭha.

Leave a Reply

Your email address will not be published. Required fields are marked *