NUG Minister thawn an hmin bangaw ruangah Germany ram ah Bank account ong thei lo

Hnaṭuannak caken thawn Germany ram ah tlengpekte Kawlrammi pakhat cu NUG cozah sungtel pakhat thawn an hmin a bangaw ruangah “Sparkasse” Germany bank ah account a ong tum nan an cohlang lo.

Bank hnaṭuan pawl in account ong sak dingin a hmin an ngan tikah NUG minister pakhat thawn an hmin a bangaw ruangah computer in a cohlang lo tiah theih a si.

Bank hnaṭuan pawl khalin an thei cia lo ti a si ih hmintarlang lomi bank hnaṭuan mipakhat cun an bank lawng siloin Gremany bank tinkim ah hivekin a um ve ding a zum thu a rel.

Bank lam cun NUG cozah thawn pehparnak a nei le neilo zir zoi an tum ih bank account ongtumtu cu May 18 ah appointment an pek sal.

Germany bank pawl ah NUG thawn pehpartu bank account an ong siang lo nak san cu felfaiin theih a si lo nan bank hnaṭuantu senior pakhat cun daan lo ih sum kuatawknak le paisa thleithlaknak a um ruangah an khap mi siding a zum thu a rel a si.

Germany cozah in a ramsung bank account tuah a khap mi ah NUG sungtel zate maw, NUG sungtel mibulpak a khap timi khal felfaiin theih a si hrih lo.

Hivek boruak a um mi hin nitlaknak ram pawl in Kawlram thawn pehparmi khapawknak an tuah mi le NUG cozah theihpitu ram ṭhenkhat an um zo mi hin teh leitlunhuap ram dang pawl ah hmual a va nei lo si pei maw ti`n thusutding tampi a um a si.

Leave a Reply

Your email address will not be published. Required fields are marked *