Nubik Zuun ngai in kum 10 sung kharhkhumaw unau 3 an run suak

Gujarat, Rajkot khua ah Kum 10 kim sung, innsung ih kharhkhumaw unau thum cu NGO pawlkom pakhat a si mi Saathi Seva Group in an runsuak ih tu ah ṭhat lam an pan vivo.

An mah cu kum 30-42 karlak mi an si ih nubik ih thihsan tuarlo ah lenglam mi thawn pehtlaihawknak nei lo in nitleu lutnak um lo mi inn-khaan sungah kum 9 luan an kharhkhumaw.

Ambrish le Bhavesh tiih koh mi mipa pahnih le nautabik nu Meghna Mehta cu an duhdawt zetmi innsang nubik in Kum 2010 ah a thihsan hai ih cuih ṭum in sangkate umlonak inn-khaan sung ah an kharhkhumaw.

Va runsuaktu Saathi Seva Group NGO ih ṭuanvonei Jalpa Patel cun “Pa khal an nei lai nan an duhdawt zetmi nubik in a thih san cu an tuar theilobik si ko. Kum 85 mi innsang pabik Navin Mehta ih theihternak zar ah kan va runsuak thei” a ti.

Navin Mehta in nitinten ei-in ding a pe hai ringring ih a mah cu innsung a lut ngam lo. Hnam le mitkher thiamnak (black magic) in i siatsuah pang ding a ti.

NGO hnaṭuan Jalpa Patel tei` pawlkom cu Navin Mehta in December 27 ah theihternak ca a kuat ih December 28 ah a fale pathum cu an va runsuak.

“Inn luhnak gate an hren ih lenglam mi thawn pehtlaihawk an duh lo. Sangka kan boh cu kan mangbang thluh. Hnawmbal peng mi lak ah an um. Mipa pahnih cu taklawng in an rak um. Ek le zun thawh nakih an hman cih ruangah innsung rim cu celhawk ṭha a si lo.”

“Nautabik nunau cu hnipuan a hruh. A pai` tanta mi ei-in an rak bawl. An sam le khabehmul thawn mihring khal an bang lo. Upabik Ambrish (kum 42) cu ṭhiṭha khalin a ding thei lo ih rawl khal a bar ṭhiṭha thei lo. A ruh lawng a tang. Nauta deuh Bhavesh (kum 34) cu hlan thu zianghman mang nawnlo in a um” tiah NGO hnaṭuan Jalpa Patel cun a sim.

Mr Mehta fale pathum hi fimthiamnak lam ih zirsang an si. Mipa pahnih in Economics le Law degrees an ngah ih nautabik Meghna cu Psychology in Master degree a ngah.

“Hivek dinhmun kan thleng nak san cu kan sungkhat pawl in dawi in cam ruangah le nubik in a thihsan mi an tuar theilo ruangah a si” ti`n Mr Mehta in a sim.

Saathi Seva Group in an va runsuak hnu ah an Lu kawng sak in an thianfai hnu ah thinlung le thluak lam buainak an nei le neilo check dingin Rajkot cozah siizungpi ah an kuat.

Tu ahcu ṭhat lam an pan vivo ih an umdan ih zir in pabik kut ah up leh an tum a si.

Leave a Reply

Your email address will not be published. Required fields are marked *