Nivar Cyclone in Tipi sung ta a sem suakmi Sui tamzet an sar

Nivar cyclone in India ramṭhen a naui hnu, Andhra Pradesh, East Godavari district, Uppada khua kiang tipikap ah ṭhimum tiat Sui tamzet an sar.

Thlisia hrang mi in tilik a tho ter ih tipi sung ih um mi Sui pawl cu tisuar in tikap ah a sawisuak siding an zum.

November 27 ah cuih sui cu hmuhsuah a si ih Uppada khuami mipum 50 lenglo in an sar ciamco. Khawinah in Sui pawl an suak ti cu theihcian a si lo nan hih hmun kiangkap ih rak um dah mi temple ropi pahnih tipi sungah a pil dah ti`n thuanthu a um.

“Khua hlan ah hih hmun ih Inn le temples an sak tikah dau hrang ah ti`n foundation ah Sui ṭhimum an phum tel ṭheu. Tikcucaan a rei tikah cuih inn le temple cu tipi ṭhang in a khuh hai. Cumi Sui pawl kha Cyclone Nivar in a semsuak siding” tualsungum sub-inspector Lovu Raju in a sim ih “minung 50 hrawng in an hawl ciamco nan a hmulotu khal an um” a ti.

Tuhlan kumkhat luan hrawng ah khan Uppada khua thawn hlattuklonak hmun Konappa Peta khua ah Cyclone ih semsuak mi Sui tamzet a rak suak ve dah a si.

sub-inspector Lovu Raju cun “biaknak thawn pehpar ih hih hmun kiangkap ra ṭheu pawl khal in dau ṭhatnak ah ti`n tisung ah Sui ṭhimum an tan ṭheu. Cumi pawl kha Cyclone Nivar in a sawisuak mi khal a si men thei” a ti.

Leave a Reply

Your email address will not be published. Required fields are marked *