Nigeria Biakinnsung bomb puak le Kahawknak ah nauhak telin amalbik mithi 21 an um – Government Official

Nigeria, Owo, St Francis Catholic biakinnsung bomb puak le kahawknak ah amalbik mithi 21 an um ti`n Local Government in official in media hnen ah a sim.

June 5, zarhpini khawm lai fangah misual pawl in bomb an puah ih sangkate ihsin biakinnsung an kap ciamco.

Ondo State Governor spokesman Richard Olatunde in “Biakinnsung khalah an lut lo. Dynamite an puah hnu ah sangkate ihsin biakinnsung an kap ciamco. Nemhnget mithi 21 an um zo” ti`n AFP hnen ah a sim.

Biakinnsung kaptu misual pawl hi mipum ziangzat an si ti theih fiang a si lo nan biakinn naivai ih um mipakhat cun misual 5 an si ti`n AFP hnen ah a sim ve.

Mithi um zat hi report dan a bangawlo ih Ondo State House of Assembly ṭuanvonei Adeyemi Olayemi cun mithi 28 le hriam tuar tampi an um ti`n CNN hnen ah a sim ve thung.

“Mawṭaw cycle thawn an si ih biakinn an thleng veten an kap cih. Biakinn sung ih thi an tam. Siizung thlen hnu ih thi khal an um. Hriam tuar pawl cu Federal Medical Center ah zohkhen an si” a ti.

Biakinn kaptu hi atu ca kan ngan tiangah zo an si ti theih a si lo ih, an kah duh nak san khal thufelfai theih a si hrih lo.

Leave a Reply

Your email address will not be published. Required fields are marked *