Ni 8 sung a hawl hnu ah Ui Fim in Nauhak kum 2 mi Ruak Sar Suak

Kandung zarh, Kerela lei min nakih mi hlo nauhak pakhat cu ni 8 rei hnu ah an uico in a ruak a sar. Nauhak nute cu kum 2 mi a siih Pradeep Kumar ih fanu a si.

Pradeep Kumar te sungkua cu Tata company laakphakkung cingtu minung 82 umnak innpi a ciim mi lakih telve an siih innsang pa Pradeep Kumar ruak cu tlawngkai nihnih ah volunteers pawl in an sar zo.

Tlawngkai ninga zaanlam ah miruak hawltu volunteers pawl in ui bo thawm an thei ih an vo zoh tikah, ui co cu a tlan vivo. A umdan danglam tuk ruangah an thlun vivo ih leiminnak thawn peng hnih le hrek hlatnak tiva kap ah a hruai hai.

Cuih hmun an thleng veten ui co cun nasaten a bo sinsin ruangah thil pakhatkhat a um ko ding ti`n kiangkap naivai ah an hawl ih nauhak kum 2 mi cu tipikap hnawmbal pawl lakah thi cia in an sar.

Cuih miruak cu Pradeep Kumar fanu Dhanuska (kum 2) a siih a hmusuaktu uico khal an mai` uico Kuvi a si ti`n official in an phuang.

Miruak hawl volunteer Rahul cun, “Kiangkap pawl simdan ahcun hih uico in rawl khal ei mumal loin a sungte pawl catbang loin a hawl. Tukhalah kan hmu thei hrih lo mi Dhanuska unu le a nu hawl dingin a suak lala zo” a ti.

Kerela, ruahpi ceen ruangih inn min ah minung 80 luan an tel ih tu ni tiang, miruak 56 an phorhsuak zo a si.

ref:TNC

Leave a Reply

Your email address will not be published. Required fields are marked *