Ni 7 nak ah Mihlo Naute Lal Siam Thara cu thi cia in a ruak an sar +Thuhlacipciar

Mizoram, Vairengte khua ih nauhak kum 2 luan hlo cu a hawltu beidong zik hnu ni 7 nak ah thi cia in a ruak an sar.

A ruak an hmu nak cu a pai` tantanak Thlaam thawn km 5 hrawng hlat nak Khuk can tidai ah a si ih, tu ah a ruak cu zo hman an tham siang hrih lo.

Athih san bik khal theih cian a si hrih lo ih tuanvoneitu in zohhliah ciamciam in a ruak an phorh hnu, postmortem an nei hnu lawng ah a thih nak san thieh cian a si leh ding. Mithitu Lal Siam Thara (kum 2 le hrek) hi Pu C.Zo Than Mawia ih fapa neihsun a si.

Pu C.Zo Than Mawia cu Auto Rickshaow mawng in pumcawmaw mi a si ih Covid 19 boruak le ramri buainak ruangih Petrol har ah Vairengte khua leng ih Vai pawl hnen ah a thupten Petrol a lei ṭheu.

November 11 zing ih Petrol a lei tum ah a fapa Lal Siam Thara, an inn kaing ih nauhak kum 9 mi le midang kum 16 mi mipakhat a hruai. Khua pawn an thleng ah a fapa le nauhak kum 9 mi cu Thlaam ah an tanta ih a hruai mi kum 16 mi thawn Petrol lei ding in an feh.

Nauhak pahnih cu Thlaam ah an lek ih kum 9 pate cu ekthawh dingin hmun dang ah a feh lawk. Ek a thawh lai ah Lal Siam Thara ṭap thawm vek a thei ih hmanhmawh zetin Thlaam a va pan nan Lal Siam Thara cu a rak um nawn lo. Asinan ṭap thawm vek cu a thei rero lai ruangah ṭapawn suak nak siding a zum nak lam ah a va hawl vivo nan zohman a hmu lo ruangah an khua lam pan in a tlung sal.

Pu C.Zo Than Mawia te cu petrol lei ṭheh in Thlaam cu an va pan nan zohman an rak um nawn lo. Kiangkap an cuan kual nan thawmvang ziang hman a um lo ruangah nauhak pawl cu an tlung zo siding tiah ruat in Khua lam ah an tlung sal.

Inn a thleng ah a fapa cu inn ah a rak um lo ih a fapa thawn a tanta mi kum 9 pate cu thuhla umdan a sut ciang hnu ah Thlaam lam pan sal in a fapa cu a va hawl sal. Thei tawk in a hawl rero nan a hmu thei cuang lo ruangah beidong in Khua lam ah thuthannak a nei.

Cutin mibur in an hawl thok ih hmu theilo beidong ah thlacam thiam an timi pawl tiang an ron ih cu pawl ih khihhmuhnak hmun khal ah an hawl nan Lal Siam Thara cu an hmu thei cuang lo.

YMA daan in mihlo cu ni 7 sung hawl ṭheu an si ih tu ni November 17 hi a ni sarih nak a si. Vansia Vanṭha thlak zetin a ni netabik an hawl ni sun nazi 2 luan hrawng ah Lal Siam Thara ruak cu Cachar le Vairengte ramri ih tidai li khuk can hrawng ah a bokkhup in an hmusuak a si.

Tu ah mithi ruak cu ni 7 sung an hawl mi Lal Siam Thara a si ti`n namhngetnak an nei zo ih a ruak cu Aizawl forensic lam in zohciannak an nei hnu ah a ṭul dan vekin hmalaknak an nei vivo ding a si.

Leave a Reply

Your email address will not be published. Required fields are marked *