Ni 30 hnu ah Beirut Innsiat tang in Minung Lungtur thawm an thei

Leitlunpi hnihtertu Beirut tipikap puakkuainak thla 1 cekci rei hnu ah inn siat mi Thingbelcawng, Tlakrawh, Thir le Lungṭiak tanglam in minung Lungtur thawm an thei.

Lebanon khuapi Beirut tipikap godown ih ret mi 2,750 tonnes ammonium nitrate cu August 4 2020 ah a puak ih minung 200 kim zik an thi. Minung 6500 lenglo nih hriamhma an tuar ih Inn le Lo siatral, umnak neilo minung 300,000 hrawng an um.

Himi puakkuainak ah tu ni tiang mi 7 an hlo lai ih ramdang bawmnak thawn cuih mihlo pawl cu an hawl pehzom rero.

Chile ram mithiam pawl in Flash tiih an ko mi Ui fim thawn mihlo an hawl ih 3 September, tlawngkai nili ah an hruai mi Ui fim cun inn siat mi hnawmhne tangah minung rim a thei ih leilung huat phah in a virh vivo.

Cuih hmun cu tulai technology Thermal imaging hmang in an scan ih minung pahnih umvek in an hmu. Taksa fate pakhat in taksa tuum a pawm lai a lang ih minute pakhat ah voi 18 thawthawt thawm khal a lang cih.

Cuveten, cuih hmun ih hnawmbal pawl an haai ih Thermal imaging sensor ih lang mi minung taksavek cu an hawl. Aum nakding awmang cu nasaten an hawl nan zianghman an hmusuak lo.

Hih thuthawn pehpar in mihlo hawlnak ih volunteer civil defense Qasem Khater cun, “Cet ih khihhmuhnak pawl ah kan hawl nan zianghman kan hmu lo.” a ti.

A rualpa volunteer Mansour Ai Asmat cun, “hmun dang khalah cet kan hmangmi sensor in minung Lungtur awn a kaai ngah. Ui fim in minung rim a theihnak hmun le kan cet ih khihhmuh nakah nasaten kan hawl. Hnawmhne kan haai tapiang in kan cet hmang mi signal a cak sinsin. Minung umnak neih vivo vek in a lang nan zianghman kan hmusuak lo” tiah CNN hnen ah a sim ih “a hawltu pawl cun 100% rorin minung umding kan zum. Nan, a thi maw a nung ti cu a ciang lo” a ti.

Mansour Ai Asmat cun, “Ui fim in minung riim a hnim ngah mi cu a ciang rori tinak a si. Kan ruahsannak pawl cu Ui fim le Cet kan hmang mi ah a ṭhumaw. Kan theihhngilh loding thupi pakhat cu Haiti ram linghnih lai ah innsiatmi tangah rawl lo ti lo in ni 28 umsuaktu an um a si kha.”

“Kan hawl nak ah zianghman a um lo khal si men thei. Nan, an pahnih rorin khihhmuhnak an nei tikah thil pakhat khat a um ti cu a ciang. Curuangah Ui fim in minung riim a hnim ngah sung le Cet ih a khihhmuh sung cu kan hawl caamcin ding” a ti.

Mihlo hawltu pawl cun hawlpeh vivo an duh nan khua thim zo ruangah le a dingdar zet mi inn phar pawl a ciim pang thei ruangah cozah lam in cawl lawk dingin a kham.

Leave a Reply

Your email address will not be published. Required fields are marked *