Ni 3 luan hnu ah Inn cim lak in Kum 2 nute run suak +VIDEO

Turkey : Linghnin ruangih Izmir khua Inn cim mi lakih tang, kum 2 nute Ayda cu Linghnin hnu nazi 91 rei hnu ah an run suak.

October 30, nazi 11:50 GMT hrawng ah Samos tikulh nisuahnak lam in 7.0 magnitude thacak ling a hnin ih minung 100 luan thi in mipum 1000 luan in hliamhma an tuar.

Abikin Izmir khua in a tuar cuangih khuasung innpi 17 a cim. Linghnin hnu ih a run pehzom bet ṭheu mi aftershocks khal voi 1508 luan a suak zo. Cumi lakih aftershock voi 44 cu 4.0 magnitude thacak an si.

Red Cross, ralkap le NGO ṭhenkhat in Inn cim lakah mithi/mihlo cat bang lo in an hawl lai ah kum 2 nute Ayda cu an hmusuak.

“A au aw kan thei. A hmin kan sut ih …’ka ṭha ko a ti. In hmu thei le na kut zap aw kan ti ih kan sim vek in a tuah cih” tiah Red cross ih ṭuanvonei mipakhat cun a sim.

“Kan hmusuak cu pakan kholhnak dishwasher kiang ah a rak um. Mangbang thlak zet in hliamhma tum khal a tuar lo ih a khawng aw lo. Dishwasher in a hum a bang” tiah Red cross hotu in a sim.

A nu in inn cim lak ah a thih san ih a pa cu Linghnin lai ah inn ah a um lo.

Ayda an run suak thei veten mi bawm hnaṭuan pawl cu mitthlitlak lungawi in an au ciamco.

Izmir ah innpi 17 a cim ih mi bawm hnaṭuan pawl cun cumi lak ihsin Inn 5 lawng an hawl thei lai tiah CNN in a ngan.

Leave a Reply

Your email address will not be published. Required fields are marked *