Nepal Vanzam tlaknak ah miruak 21 hmusuak zo

Mipum 22 tomi Nepal ram vanzam tlakmi cu an hawl hmu zo ih mithiruak 21 hmusuak zo in a tang hrih mi passenger pakhat an hawl pehzom.

Tara Air 9 NAET vanzam fate hi a zam suak hnu minute 20 hrawng ah air traffic control room ihsin an pehtlaih thei nawn lo.

May 29, zinglam nazi 10 hrawngah Nepal ram, Pokhara khua ihsin a zam suak ih a áš­um nak ding Jomsom khua a thlen hlan, minute 5 duh hrawngah Mustang district ah a tlak.

Khawmi pawl in vanzam tlak an hmu thu report an tuah veten Helicopter thawn an hawl cih nan nikhua sia ruangah hawl khawsuak thei loin, Tlawngkai nikhat zing lawngah a tlaknak an hmusuak thu Nepal cozah in an phuang.

“Ruak 20 cu an hmu zo. Ruak 1 hi a umnak a hraap tuk ruangah an lak thei hrih lo. Atang hrih mi pakhat khal an hawl pehzom” ti`n Nepal Civil Aviation Authority spokesman Deo Chandra Lal Karn in BBC hnen ah a sim.

Vanzam totu hi amawngtu telin Nepal rammi 16, German 2, India rammi 4 pawl an si ih vanzam tlaknak san hi Nepal cozah in zirzoinak a nei ding.

Nepal ram ah vanzam cangsualnak a um thei zet ih a tamsawn cu rinlopin nikhua boruak a thlengaw ruangah a si.

Leave a Reply

Your email address will not be published. Required fields are marked *