Nazi fir nak ih kum 6 mi fapate hmang tu Nu le Pa mual pho

London : $ 86,479 man Royal Offshore Oak nazi fir nak ih kum 6 mi fapate hmangtu Romania ram mi nupate cu thuṭhenzung ah an mual pho neknek.

llie Para le Marta Para-Bloj (kum 33 veve) nupate cun September 19 ah 18-carat rose gold sui rong dang thawn tuah mi $ 86,479 man nazi cu luxury Knightbridge dawr ta an fir ih a thaizing ah an kai ngah.

Cuih dawr ahcun nazi an fir hlan ninga duh ah nazi lei ding vek in a phunphun an zoh ciamco ih 18-carat rose gold thawn tuah mi nazi man khung cu lei duh vekin fiang thei ding tawk in an zuk ciamco.

Ni 5 hnu ah cuih dawr ahcun nazi lei taktak thlang ding vekin an fapa kum 6 mi te an hruai ih dawr sung ah an lut.

Dawr kiltu cu nazi phunphun an phorh ter ih khawdang a tang sung ah an fapa te kawr hnuai ih an ret mi 18-carat rose gold nazi thawn bangaw zet mi nazi lem cu a tak thawn an thleng thup loh li.

Cuhnu ah lei ding le ding lo kan ronawta ding ti`n dawr cu an suahsan tum ih dawr kiltu cun an umnak address a sut hai.

Nupate cun London ih an umnak address an sim hnu ah miṭha fel zet te bang in nazi dawr cu an suah san.

A thaizing ah dawr kiltu cun 18-carat rose gold nazi cu a pianhmang a dang deuh ruangah a zoh ciang cu an dawr ih nazi man khung serial number an cuk mi a um ve lo mi a hmusuak.

Cuveten thil um dan an thei ciang ih palik hnen ah an sim lohli ih palik cun an inn ah an va pan loh li.

Nupate cun an innsung thilri hmuahhmuah lawng ter ṭheh in inn an hlang mi cu an rak suahsan zo. Nan, vanṭhat nak ah nazi an fir ni ih an to mi motor cu palik in an hmusuak ih an va kai lohli.

Cutin palik kutsung ah kilkhawi an siih November 2 ni ah thusutnak nei dingin thuṭhenzung ah an suah pi.

An thuhla ngan mi cu thuṭhentu in a siar ṭheh hnu ah CCTV ih zuk ngah mi nazi an fir lai video cu thuṭhentu in zohciangnak a nei.

Judge Grieve in “CCTV thawn zuk mi video sungah cun naute an cawi mi a ṭap rero in a lang. Cufangah dawr kiltu khawdang a tang sung ah naute kawr hnuai ih nazi lem cu 18-carat rose gold nazi thawn an thleng thup in ka hmu. Curuangah thil um dan cu tum cia ih tuah/fir hrim mi rori a si” a ti.

Romania te nupa cu thuṭhenzung sung ah an mualpho neknek ih thil an fir lai video rorin a um ruangah thuphan sim thei nawn lo in kan fir mi a si ti`n an phuang aw.

An pahnih in palik kut sung ah up sal an si ih December 14 ah Southwark Crown thuṭhenzung ah sual an tuah mi vek in daantatnak an nei ding a si. (MirrorUK)

Leave a Reply

Your email address will not be published. Required fields are marked *