Nazareth ah Jesuh ṭhangliannak Lunginn siding zumummi hmusuak

Jesuh ṭhangliannak Lunginn siding zumummi cu England, Reading University ih Prof. Ken Dark in ka hmusuak ti`n a cabu suah mi (The Sisters of Nazareth Convent: A Roman-period, Byzantine, and Crusader site in central Nazareth) sungah a ngan ih MailOnline hnen khal ah a sim.

Sisters of Nazareth Convent innpi hnuai ih Mary le Joseph tei` sungkua umdahnak siding zumummi kher cawp Lunginn cu Prof. Ken Dark in kum 14 sung rori zirzoinak a nei ih cumi ih a hmusuak mi cu a cabu suah mi ah a ngan a si.

1st century hrawng ihsi rak um zo mi cuih innpi cu Jesuh tei` sungkua rak umdahnak inn a si ti`n 19th century hrawng ah zumnak a rak um thok zo nan 1930 kum hrawng ah cuih zumnak cu archaeologists pawl in an hnong.

Cuhnu in cuih hmun cu an theih hngilh sawhsawh ih Kum 2006 ah Prof. Ken Dark in a thar in zirzoinak a nei ṭan sal mi a si.

“Jesuh umnak inn thuhla zirzoi dingin Nazareth khua ah ka feh lo. Byzantine Empire san lai ih Christian biaknak hmunlaili dinhmun in zirzoinak nei ding in ka feh sawn mi a si” tiah Prof. Ken Dark in a ti.

Jesuh ṭhangliannak hmun tiih ruah mi Lunginn cu Byzantine Empire san lai ih biakinn hnuai ah hmuhsuah a si ih cuih biakinn cu Sisters of Nazareth Convent innpi tang ah a um a ti.

Prof. Ken Dark cun “kan hmusuak mi ah hih biakinn cu 7th Century lai ih ngan khum a si mi Jesus ṭhangliannak hmun hminsinnak ih sak mi Church of the Nutrition a si tiah zumnak kan nei.

Lunginn cu 1st Century hrawng ih sak mi siding an zum ih Lungpuk kher ih sak mi a si.

Prof. Ken Dark cun “Lunginn sak/kher dan kan zoh tikah a saktu cu “tekton” tiih kohmi Lungto thawn pehpar mi kutthiam sang zet neitu a si ding. Mary ih pasal Joseph tla kha Bible ah “tekton” ti`n an ngan khum a si.”

“Zirzoinak ih kan hmusuak mi khihhmuh in hih hmun cu Jesus ṭhanliannak Lunginn rori a si ti`n cu ka sim thei lo nan a neih bik ih kan rel thei sun a si” a ti.

Leave a Reply

Your email address will not be published. Required fields are marked *