Nauhak zuk fir in Zahmawh lam website ah mibum nakih hmangtu an tam

Riverton, Utah ih um Brittany Champagne cun Facebook ih a post mi a fa le pathum zuk pawl, zahmawh thawn pehpar mi website ih a hmu tikah thinheng riahsia in tuardanding khal a thiam lo.

A mah hin kum 8 le kum 9 mi fanu pahnih le thla 9 mi fapa pakhat a neiih, an zuk pawl cu Facebook ah a thlah ṭheu. Cuih zuak pawl cu an fir sak ih kum kim lo nauhak nupa sinak hmangpi duhtu pawl thlem nakah an hmang sak.

Brittany cun, “Instagram ah rualpi profile ka hawl rero lai ah ka fanu zuk profile hmang mi account pakhat ka hmu. Ka mangbang tukih zuk hashtag ka thlun in ka click vivo tikah zahmawh thawn pehpar mi website ah ka va thleng.” a ti.

Cuih website ah a fanu 2 le thla 9 mi a fapa zuk pawl a va hmusuak. Zuk ahcun “hivek nauhak rualpi ṭha nei na duh maw? Rualpi lo zawng khal in na kom thei” ti`n ca an ngan ih kum kim lo nauhak nupa sinak hmangpi duhtu pawl thlem nakah an hmang.

Brittany cun, “website 20 luan ih an hmang mi ka fa le zuk pawl cu Cyber security expert pawl in, in hlawn sak thluh. Asinan, kan hmu lo mi tamzet a um lai ding ka zum” a ti.

Amah cun “ka fa le zuk ka post tikah publick in ka ret dahlo. FB rualpi pawl lawngih hmu thei dingin ka tuah nan ka fale zuk cu an fir thei thotho. Privacy setting ka tuah mi a dik lo si men ding. Ka fa le an upa tikah ziangtin ka sim ngam ding. Ningzak um tuk rori” a ti.

Hivek buainak tongtu an tamzet zo ruangah social media ih zuk kan thlah tikah raring cio dingin Cyber security expert pawl cun forhfialnak an nei a si.

ref:TSP,IT

Leave a Reply

Your email address will not be published. Required fields are marked *