Nauhak pawngsual ruangah Voi 146 Vuakthawi Hremnak A Tuar

Indonesia, Aceh province ih nauhak pawngsualtu Kum 19 mi cu khuatlang mipi hmai ah voi 146 vuakthawi in hremnak an pe.

Aceh province cu Indonesia ramsung ih Islamic biaknak Daan thlun mi ramṭhen a siih Islamic Daan pahbaltu cu khuatlang mipi hmai ah hremnak pek an si ṭheu.

Kum kimlo nauhak pawngsual ruangah tukum thok lam ih kaihkhih mi tlangval kum 19 mi cu palik ih vuak celh lo in a ṭap ciamco ih ngaithiam hram dingin a au ciamco.

A nat tuar lo ah a to sutsi ih doctor in zohciangnak a nei lawk. Cuhnuah an vuak bet ih sualnak tum deuh tuah pawl hrem an pe ṭheu mi voi 146 vuaknak an nei hnu lawng ah an cawl.

East Aceh prosecutor zung ih ṭuanvonei Ivan Nanjjar Alavi in “hitiih vuakthawi in kan hremaw mi cu neta ah sual tuah nawn hlah hai seh ti ka duh ruangah a si. Rim dingin daantatnak kan nei mi a si” a ti.

Human rights pawlkom pawl ih sawiselzetmi khuatlang mipi hmai ih vuakthawi hremawknak cu mipi in an zoh duh zet ih tuṭum cu Covid 19 boruak ruangah a zohtu an um lem lo.

Aceh province ah hin ṭhitaw hlan ih nupa sinak hmang, uiretnak, paisa thaap ih lehnak, zu-in, tuai neiaw tvk ruangah khuatlang mipi hmai ah hremnak an pe aw ṭheu a si. (INP)

Leave a Reply

Your email address will not be published. Required fields are marked *

error: hahahahahaha !!